يراندا يزرايل شابۋىلىنان 220 دان استام ادام قازا تاپتى

استانا. KAZINFORM - يزرايلدىڭ يران اۋماعىنا جاساعان سوققىسىنان 224 ادام قازا تاۋىپ، 1200 دەن استام ادام جارالاندى. بۇل تۋرالى يسلام رەسپۋبليكاسى دەنساۋلىق ساقتاۋ مينيسترلىگىنىڭ رەسمي وكىلى حوسەين كەرمانپۋر مالىمدەدى، دەپ حابارلايدى ت ا س س اگەنتتىگى.

- يزرايلدىڭ 65 ساعاتتىق اگرەسسياسىنان كەيىن قازا تاپقاندار مەن جارالانعاندار سانى 1481 گە جەتتى، ونىڭ 1277 ءسى ەلدەگى ۋنيۆەرسيتەت كلينيكالارىنا جاتقىزىلدى. قازىر 224 ادام قايتىس بولدى، - دەپ جازدى ۆەدومستۆو وكىلى X جەلىسىندەگى پاراقشاسىندا.

ول زارداپ شەككەندەردىڭ 90 پايىزدان استامى بەيبىت تۇرعىندار، سونىڭ ىشىندە ايەلدەر مەن بالالار ەكەنىن اتاپ ءوتتى.

ەسكە سالايىق، 13-ماۋسىمعا قاراعان ءتۇنى يزرايل يران اۋماعىنا جاپپاي سوققى جاساعان. وعان جاۋاپ رەتىندە تەگەران جۇزدەن استام دروندى يزرايل باعىتىنا ۇشىردى. يران ناتانزداعى يادرولىق نىساننىڭ زاقىمدانعانىن راستادى، الايدا رادياتسيانىڭ تارالۋىن جوققا شىعاردى.

ب ۇ ۇ- داعى يران وكىلى يزرايلدىڭ اۋە سوققىلارى سالدارىنان 78 ادامنىڭ قازا تاپقانىن، تاعى 320 دان استام ادامنىڭ جاراقات العانىن مالىمدەدى. قازا بولعاندار قاتارىندا يراننىڭ جوعارى اسكەري باسشىلىعى مەن جەتەكشى عالىمدار بار.