يراندا پرەزيدەنت سايلاۋى 28-ماۋسىمدا وتەدى

استانا. KAZINFORM - يران ۇكىمەتى دۇيسەنبى كۇنى ەلدەگى 14- پرەزيدەنتتىك سايلاۋدى 28 -ماۋسىمدا وتكىزۋ تۋرالى شەشىم قابىلدادى. بۇل تۋرالى يراننىڭ يرنا اگەنتتىگىنە سىلتەمە جاساپ شينحۋا حابارلادى.

سايلاۋ كۇنى بۇگىندە پرەزيدەنت قىزمەتىن اتقارىپ جاتقان يراننىڭ ءبىرىنشى ۆيتسە- پرەزيدەنتى مۇحامماد موحبەر، سوت جۇيەسىنىڭ باسشىسى گولام حوسەين موحسەني- ەدجەي، پارلامەنت سپيكەرى موحامماد باگەر گاليباف، سونداي-اق پرەزيدەنتتىڭ قۇقىقتىق ماسەلەلەر جونىندەگى ۆيتسە-پرەزيدەنتى موحامماد دەحگان مەن يراننىڭ كونستيتۋتسيالىق كەڭەسى مەن ىشكى ىستەر مينيسترلىگى وكىلدەرى قاتىسقان وتىرىستا بەلگىلى بولدى، دەلىنگەن حابارلامادا.

يران پرەزيدەنتى يبراحيم رايسي مەن ونىمەن جانىندا بولعان كوماندانىڭ كەيبىر مۇشەلەرى، سونىڭ ىشىندە سىرتقى ىستەر ءمينيسترى حوسەين امير ابدوللاحيان دۇيسەنبى كۇنى تاڭەرتەڭ تەگەراننان شامامەن 670 شاقىرىم جەردەگى ۆارزاكان اۋدانى ماڭىندا قۇلاعان تىكۇشاقتىڭ سىنىقتارى تابىلعاننان كەيىن قايتىس بولدى، دەپ جاريالاندى.

يران كونستيتۋتسياسىنىڭ 131-بابىنا سايكەس، ەگەر پرەزيدەنت ءوز مىندەتىن اتقارا الماسا، اتقارۋشى بيلىك ۋاقىتشا ءبىرىنشى ۆيتسە- پرەزيدەنتتىڭ قولىنا وتەدى، ول 50 كۇن ىشىندە جاڭا پرەزيدەنتتى سايلاۋدى ۇيىمداستىرۋعا مىندەتتى.

كەزدەسۋ بارىسىندا قاتىسۋشىلار سونىمەن قاتار اتقارۋشى دەلەگاتسيالاردى جاساقتاۋ، كانديداتتاردى تىركەۋ جانە سايلاۋ ناۋقاندارىن باستاۋدى قامتيتىن سايلاۋ پروتسەسىنىڭ كەستەسىن جاسادى، دەپ حابارلايدى يرنا.

«كەستەگە سايكەس، تىركەۋ 30-مامىردان 3-ماۋسىمعا دەيىن جۇرگىزىلەدى، سودان كەيىن كانديداتتار 12-27 -ماۋسىم ارالىعىندا سايلاۋالدى ۇگىت- ناسيحات جۇمىستارىن جۇرگىزۋى ءتيىس»، - دەلىنگەن حابارلامادا.

يرنا مالىمەتتەرىنشە، كونستيتۋتسيالىق كەڭەس كەستەنى بەكىتتى.

اۆتور

زارينا تۋعانبايەۆا