يراندا جاڭا قورعانىس كەڭەسى قۇرىلدى

استانا. KAZINFORM - جاڭا ورگان قورعانىستى جوسپارلاۋ جانە ارميانى جاڭعىرتۋ سالاسىنداعى ۇيلەستىرۋدى كۇشەيتۋگە ارنالعان، دەپ حابارلايدى Kazinform ءتىلشىسى.

يراننىڭ ۇلتتىق قاۋىپسىزدىك جوعارى كەڭەسى قورعانىس ستراتەگيالارىن ازىرلەيتىن جانە قارۋلى كۇشتەردىڭ مۇمكىندىكتەرىن ورتالىقتاندىراتىن تۇردە كۇشەيتەتىن قورعانىس كەڭەسىن قۇرۋدى ماقۇلدادى.

IRNA اگەنتتىگىنىڭ حابارلاۋىنشا، جاڭا ورگان يران كونستيتۋتسياسىنىڭ 176-بابىنا سايكەس قۇرىلعان. ونىڭ نەگىزگى مىندەتتەرى - قورعانىس جوسپارلارىن باعالاۋ، ۇزاق مەرزىمدى اسكەري تاسىلدەردى ازىرلەۋ جانە قارۋلى كۇشتەردىڭ تيىمدىلىگىن ارتتىرۋ.

كەڭەستى يران پرەزيدەنتى ماسۋد پەزەشكيان باسقارادى. ونىڭ قۇرامىنا بيلىكتىڭ ءۇش تارماعىنىڭ، ەلدىڭ جوعارى اسكەري قولباسشىلىعىنىڭ باسشىلارى، سونداي-اق ءتيىستى مينيسترلىكتەردىڭ وكىلدەرى كىرەدى.

- جاڭا قورعانىس ورگانى ورتالىقتاندىرىلعان تۇردە قورعانىس جوسپارلارىن قاراستىرادى جانە يران قارۋلى كۇشتەرىنىڭ مۇمكىندىكتەرىن ارتتىرادى، - دەلىنگەن ۇلتتىق قاۋىپسىزدىك جوعارى كەڭەسىنىڭ حاتشىلىعىنىڭ مالىمدەمەسىندە.

Fars اگەنتتىگىنىڭ حابارلاۋىنشا، كەڭەستى قۇرۋ تۋرالى شەشىم ۇلتتىق قاۋىپسىزدىك جۇيەسىن كەڭ اۋقىمدى رەفورمالاۋ اياسىندا قابىلدانعان. بۇعان دەيىن وسىعان ۇقساس ورگان 1980 -جىلدارى يران-يراك سوعىسى كەزىندە يراندا جۇمىس ىستەگەن.

يزرايلمەن جالعاسىپ جاتقان شيەلەنىس جاعدايىندا يران ارمياسىنىڭ قولباسشىسى امير حاتامي جەكسەنبى كۇنى تەل-اۆيۆتەن كەلەتىن قوقان- لوققىلار «ماڭىزدى بولىپ قالا بەرەدى جانە ونى ەلەمەۋگە بولمايدى» دەپ اتاپ وتكەن بولاتىن.