يران يزرايلگە شابۋىل جاسادى

استانا. KAZINFORM - يران بالليستيكالىق زىمىراندار مەن درونداردى قولدانا وتىرىپ، يزرايلگە جاپپاي شابۋىل جاسادى، دەپ حابارلايدى IRNA.

ت ا س س- تىڭ حابارلاۋىنشا، تەگەران ءيزرايلدىڭ حايفا قالاسىنداعى مۇناي وڭدەۋ زاۋىتىنا سوققى بەرگەن. بۇل تۋرالى يراندىق تەلەارنا حابارلادى.

يراننىڭ يزرايل اۋماعىنا زىمىران شابۋىلىنىڭ ماقساتى ونىڭ نەگىزگى ەنەرگەتيكالىق نىساندارى بولدى، دەپ حابارلادى Fars اگەنتتىگى.

ەسكە سالا كەتەيىك، جۇما، 13-ماۋسىمعا قاراعان ءتۇنى يزرايل يرانعا جاپپاي سوققى بەردى. بۇعان جاۋاپ رەتىندە تەگەران يزرايلگە قاراي جۇزدەن استام درون ۇشىردى. يران ناتانزەدەگى يادرولىق قوندىرعىنىڭ زاقىمدانعانىن راستادى، ءبىراق رادياتسيانىڭ اعىپ كەتكەنىن جوققا شىعاردى.

يران يزرايلگە زىمىران سوققىلارىنىڭ جاڭا تولقىنىن باستادى. ءيزرايلدىڭ توتەنشە جاعدايلار قىزمەتى حابارلاعانداي، يراندىق زىمىران اتىسىنان ەكى ادام قازا تاپتى - شامامەن 60 جاستاعى ايەل جانە 45 جاستاعى ەر ادام. تاعى 19 ادام جاراقات الدى، دەپ حابارلادى يزرايلدىڭ جەدەل جاردەم قىزمەتى.

يراننىڭ ب ۇ ۇ- داعى وكىلى ءيزرايلدىڭ اۋە شابۋىلى سالدارىنان 78 ادامنىڭ قازا تاپقانىن ايتقان بولاتىن. يراندا 320 دان استام ادام جاراقات الدى.

بۇعان دەيىن يران جوعارى شەندى اسكەري قولباسشىلار مەن جەتەكشى عالىمداردىڭ يزرايل سوققىسى سالدارىنان قازا تاپقانىن راستادى.

يران يزرايل شابۋىلىنان كەيىن ورمۋز بۇعازىن جابايىن دەپ جاتىر.