يران پورتىنداعى جارىلىستان قازا تاپقاندار سانى 36 ادامعا جەتتى
استانا. KAZINFORM - يراننىڭ بەندەر- ابباس قالاسىنداعى شاحيد-رادجاي پورتىندا بولعان جارىلىستان قازا تاپقاندار سانى 36 ادامعا جەتتى. بۇل تۋرالى يران دەنساۋلىق ساقتاۋ مينيسترلىگىنە سىلتەمە جاساي وتىرىپ «ال-ماسيرا» تەلەارناسى حابارلادى.
جارىلىس 26-ءساۋىر كۇنى بولعان. ونىڭ دىبىسى جارىلىس ورنىنان 26 شاقىرىم قاشىقتىقتاعى كەشم ارالىندا دا ەستىلگەن. شاحيد-رادجاي پورتى - يراننىڭ ەڭ ءىرى پورتتارىنىڭ ءبىرى، ەل ارقىلى وتەتىن ترانزيتتىك جۇكتەردىڭ باسىم بولىگى وسى پورت ارقىلى تاسىمالدانادى. جارىلىستان كەيىن پورتتىڭ جۇمىسى ۋاقىتشا توقتاتىلدى.
جارىلىستىڭ سەبەبى رەسمي تۇردە جاريالانعان جوق. الايدا بۇقارالىق اقپارات قۇرالدارىنىڭ حابارلاۋىنشا، جارىلىس زىمىران وتىنىنىڭ نەگىزگى كومپونەنتى - ناتري پەرحلوراتى سەبەپ بولۋى مۇمكىن دەگەن بولجام بار.
ايتا كەتەيىك، بۇعان دەيىن شاحيد-رادجاي پورتىنداعى جارىلىستان 1139 ادام زارداپ شەككەنىن جازدىق.
قايعىلى وقيعاعا بايلانىستى مەملەكەت باسشىسى يران پرەزيدەنتىنە كوڭىل ايتۋ جەدەلحاتىن جولدادى.