يران پرەزيدەنتى ەل استاناسىن وڭتۇستىككە كوشىرۋدى ۇسىندى
استانا. KAZINFORM - يران پرەزيدەنتى ماسۋد پەزەشكيان يسلام مەملەكەتىنىڭ استاناسىن تەگەراننان پارسى شىعاناعى جاعالاۋىنا كوشىرۋ قاجەتتىگىن مالىمدەدى، دەپ حابارلايدى رەسەيلىك ت ا س س.
«بىزدە ەكونوميكالىق جانە ساياسي ورتالىقتى ەلدىڭ وڭتۇستىك جاعالاۋىنا كوشىرگەننەن باسقا امال جوق»، - دەدى يران باسشىسى.
پرەزيدەنتتىڭ بۇل ءسوزىن Fars اگەنتتىگى كەلتىرگەن.
پەزەشكياننىڭ سوزىنشە، بۇگىنگى تاڭدا تەگەران بەتپە-بەت كەلىپ وتىرعان پروبلەمالاردا وزگە تاسىلمەن شەشۋ مۇمكىن ەمەس.
«شيكىزاتتى وڭتۇستىكتەن جانە جاعالاۋدان ورتالىققا جەتكىزىپ، دايىن ءونىم شىعارۋ جانە ونى ەكسپورتقا شىعارۋ ءۇشىن قايتادان وڭتۇستىككە جونەلتۋ ءبىزدىڭ باسەكەگە قابىلەتتىلىگىمىزدى كەمىتىپ وتىر»، - دەدى يران پرەزيدەنتى.
سونداي-اق ول قالىڭ كوپشىلىكتىڭ قولداۋىنا يە بولۋ ءۇشىن بيلىك الدىمەن ءوزى ءبىرىنشى قادام جاساۋى كەرەك ەكەنىن اتاپ ءوتتى.