يران ۋراندى بايىتۋدى جالعاستىرماق
استانا. KAZINFORM - يران سىرتقى ىستەر ءمينيسترىنىڭ ورىنباسارى ابباس اراكچيدىڭ مالىمدەۋىنشە، يران ۋراندى بايىتۋ جۇمىستارىن جالعاستىرادى جانە بۇل قۇقىعىنان باس تارتپايدى، دەپ حابارلايدى يرنا.
- جاقىندا بولعان جانجالدان كەيىن ولاردى يران يسلام رەسپۋبليكاسىنىڭ ۇستانىمى كۇشتى جانە بەرىك بولىپ قالا بەرەتىنىن جانە ءبىز بايىتۋدىڭ جالعاستىراتىنىمىز تۋرالى اقپاراتتاندىرۋ قاجەت بولدى. ءبىز يران حالقىنىڭ بۇل قۇقىعىنان باس تارتپايمىز، - دەدى ابباس اراكچي ىستانبۇلدا يران مەن ەۋروپالىق «ۇشتىك» اراسىنداعى كەلىسسوز قورىتىندىلارىنا تۇسىنىك بەرىپ.
ابباس اراكچي سونداي-اق يران يسلام رەسپۋبليكاسىنىڭ اقىلعا قونىمدى جانە قيسىندى شەڭبەردە بەيبىت ماقساتتاعى يادرولىق باعدارلاماسىن دامىتۋعا ءارقاشان دايىن ەكەنىن قوستى.
- ءبىز الاڭداۋى مۇمكىن ەلدەردىڭ سەنىمىنە يە بولۋدى ەشقاشان نازاردان تىس قالدىرعان ەمەسپىز. الايدا، يسلام رەسپۋبليكاسى ءوز كەزەگىندە يادرولىق ەنەرگيانى بايىتۋدى قوسا العاندا بەيبىت ماقساتتا پايدالانۋ قۇقىعىنىڭ ساقتالۋىن تالاپ ەتەدى، - دەپ اتاپ ءوتتى ول.
ەسكە سالا كەتسەك، 22 -شىلدەدە تەگەراندا يران، رەسەي جانە قىتاي وكىلدەرىنىڭ ءۇشجاقتى كەزدەسۋى ءوتتى. كەلىسسوزدىڭ باستى تاقىرىبى يراننىڭ يادرولىق باعدارلاماسى توڭىرەگىندەگى داعدارىستى رەتتەۋ ماسەلەسى بولدى.