يران: قاتارداعى ا ق ش بازاسىنا جاسالعان سوققى - ۆاشينگتون اگرەسسياسىنا جاۋاپ
استانا. KAZINFORM - كەشە يران ا ق ش- تىڭ كاتار مەن يراكتاعى بازالارىنا زىمىران وپەراتسياسىن جاساعان. تەگەراندا بۇل وپەراتسيانىڭ پروپورتسيونالدى بولعانى جانە قاتارعا قاۋىپ توندىرمەيتىنى ايتىلدى.
يراننىڭ جوعارعى ۇلتتىق قاۋىپسىزدىك كەڭەسى كاتارداعى ال-ۋدەيد امەريكالىق اسكەري بازاسىنا جاسالعان سوققىعا بايلانىستى رەسمي مالىمدەمە جاسادى.
مالىمدەمە ءماتىنىن Tasnim اقپارات اگەنتتىگى جاريالادى.
- ا ق ش- تىڭ يراننىڭ يادرولىق نىساندارىنا جاساعان ورەسكەل ءارى اگرەسسيۆتى سوققىسىنا جاۋاپ رەتىندە يران يسلام رەسپۋبليكاسى قارۋلى كۇشتەرى ال-ۋدەيدتەگى امەريكالىق اسكەري بازاعا زىمىران سوققىسىن جاسادى، - دەلىنگەن مالىمدەمەدە.
كەڭەس يران تاراپىنان اتىلعان زىمىرانداردىڭ سانى ا ق ش كۇشتەرى يراننىڭ يادرولىق نىساندارىنا جاساعان شابۋىل كەزىندە قولدانعان وق-دارىلەردىڭ سانىنا تەڭ ەكەنىن ناقتىلادى. سونىمەن قاتار، تەگەران شابۋىل نىسانى رەتىندە كاتاردىڭ تۇرعىن اۋداندارى مەن قالالىق ينفراقۇرىلىمىنان الىس ايماق تاڭدالعانىن باسا ايتتى.
- بۇل وپەراتسيا ءبىزدىڭ دوس كاتار مەملەكەتى مەن ونىڭ حالقى ءۇشىن ەشقانداي قاۋىپ توندىرگەن جوق. يران دوحامەن جىلى جانە تاريحي قارىم -قاتىناستى ساقتاۋعا ءالى دە دايىن، - دەپ مالىمدەدى ۇلتتىق قاۋىپسىزدىك كەڭەسى.
يران تاراپى تەگەراننىڭ ارەكەتتەرى ءوزىن-ءوزى قورعاۋ قۇقىعى اياسىندا جۇزەگە اسقانىن جانە حالىقارالىق قۇقىققا سايكەس اگرەسسياعا «اينا-قاتەسىز جاۋاپ» بولعانىن اتاپ ءوتتى.
ەسكە سالساق، دۇيسەنبى كەشكە يران كاتاردا ورنالاسقان ال-ۋدەيد امەريكالىق اسكەري بازاسىنا سوققى جاساعان ەدى.
ايتا كەتەيىك، وسى قارىمتا سوققىدان كەيىن ترامپ ا ق ش پەن قاتاردىڭ بىرلەسكەن دەلدالدىعىنىڭ ناتيجەسىندە يزرايل مەن يران اراسىندا اتىستىڭ تولىق توقتاتىلعانىن جاريالادى.