يران مىسىرعا اۋە كەڭىستىگىن ءۇش ساعاتقا جاباتىنىن ەسكەرتتى

استانا. KAZINFORM - مىسىر اۋە كومپانيالارىنا بەيسەنبى كۇنى ءۇش ساعات بويى يراننىڭ اۋە كەڭىستىگىنەن اۋلاق بولۋعا بۇيرىق بەرىلدى.

بۇيرىق تەگەراننان اسكەري جاتتىعۋلار بولاتىنى تۋرالى حابارلاما جاسالعان سوڭ بەرىلدى. بۇل تۋرالى مىسىردىڭ ازاماتتىق اۆياتسيا مينيسترلىگى ءمالىم ەتتى، دەپ جازادى Euronews.

ەسكەرتۋ وتكەن اپتادا حاماس لاڭكەستىك قوزعالىسىنىڭ جەتەكشىسى تەگەراندا ولتىرىلگەننەن كەيىن ايماقتا شيەلەنىس كۇشەيگەن تۇستا جاسالدى.

يراننىڭ اۋە كەڭىستىگىندە ۇشۋعا تىيىم سالۋ بەيسەنبى كۇنى تاڭعى ساعات 4:30 دان 7:30 عا دەيىن ءۇش ساعات بويى كۇشىندە بولدى.

ISNA اقپارات اگەنتتىگىمەن سويلەسكەن كەزدە تەگەرانداعى يران حالىقارالىق اۋەجايىنىڭ باسشىسى سايد چالانداري يراننىڭ باتىس بولىگىنىڭ اۋە كەڭىستىگىنە كىرۋگە تىيىم سالۋ تۋرالى حابارلامالاردى جوققا شىعاردى، دەگەنمەن بۇل بۇكىل ەلگە قاتىستى ما، جوق پا بەلگىسىز.

بۇقارالىق اقپارات قۇرالدارىنىڭ حابارلاۋىنشا، يزرايل شەنەۋنىكتەرى يزرايلگە ءبىرىنشى بولىپ اۋقىمدى شابۋىل جاسايتىن يران ەمەس، «حەزبوللا» ەكەنىنە كوبىرەك سەنەدى. تەگەران ءوزىنىڭ اۋقىمدى شابۋىلىن قايتا قاراستىرۋى مۇمكىن.