يران ەلشىسى: يزرايل پالەستيندىكتەردى كورشىلەس اراب ەلدەرىنە بوسىپ كەتسىن دەپ وتىر
«يزرايلگە پالەستيندىكتەردىڭ گازا سەكتورىنداعى قاقتىعىستان باس ساۋعالاپ بوسقانى كەرەك». يران يسلام رەسپبۋليكاسىنىڭ قازاقستانداعى توتەنشە جانە وكىلەتتى ەلشىسى ءالي اكبار دجوۋكار ب ا ق وكىلدەرىنە بەرگەن سۇحباتىندا وسىنداي پىكىر ايتتى، دەپ حابارلايدى Kazinform.
«پالەستيناعا كورشىلەس مىسىر، يوردانيا سياقتى ەلدەر يزرايل پالەستيندىكتەردى ءوز اۋماعىنان قۋاتىن بولسا، وسى اۋماققا سوعىس جاريالادى دەپ ەسەپتەيتىنىن مالىمدەدى. يزرايل پالەستيندىكتەردى قۋىپ تاستاعىسى كەلەدى، كورشىلەس اراب ەلدەرىنە بوسىپ كەتسىن دەپ وتىر. ب ا ق-تان كورىپ وتىرعان شىعارسىز، جەرگىلىكتى حالىق قاتىگەز بومبالاۋ ارەكەتتەرىنە، وزگە دە پروبلەمالارعا قاراماستان، جەر ءۇشىن كۇرەسەتىنىن ايتىپ جاتىر. سوندىقتان يران دا بوسقىنداردى ازىق-تۇلىكپەن قولداپ، گۋمانيتارلىق كومەك كورسەتۋگە دايىن ەكەنىن ءمالىم ەتتى»، - دەدى يران ەلشىسى.
ءالي اكبار دجوۋكار گازا سەكتورىنداعى حالىقتىڭ ۇستانىمىنا تۇسىنىستىكپەن قارايتىنىن جەتكىزدى.
«ازىرگە پالەستين جەرىنەن بوسقىن رەتىندە اۋعان ەشكىم جوق. ءتىپتى ىرگەدەگى مىسىر مەن يوردانياعا پانا سۇراپ بارعان جوق. گازا سەكتورىنداعى تۇرعىنداردىڭ ۇستانىمى تۇسىنىكتى. ءوز شەشىمدەرىنە مىعىم بولىپ، قارسىلىق كورسەتە بەرەتىندەرىن ايتىپ وتىر»، - دەدى ديپلومات.