يران اۋەجايلارىنىڭ جۇمىسى قايتا جانداندى

استانا. KAZINFORM - بۇل تۋرالى يراننىڭ ازاماتتىق اۆياتسيا ۇيىمىنىڭ وكىلى دجافار يازارلۋ مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

سەيسەنبى كۇنى يزرايلگە جاسالعان زىمىران شابۋىلىنان كەيىن يران اۋەجايى جۇمىسىن ۋاقىتشا توقتاتقان ەدى.

- قولايلى جانە قاۋىپسىز ۇشۋ جاعدايلارىن قامتاماسىز ەتكەننەن كەيىن جانە شەكتەۋلەردى الىپ تاستاعاننان كەيىن اۆياكومپانيالارعا رەيستەردى ورىنداۋعا رۇقسات ەتىلدى، - دەدى دجافار يازارلۋ بەيسەنبىدە.

ول جولاۋشىلارعا اۋەجايعا بارار الدىندا اۋە كومپانيالارىنىڭ ۇشۋ كەستەلەرىن تەكسەرۋگە جانە ساياحات جوسپارلارىن راستاۋعا كەڭەس بەردى، دەپ حابارلايدى IRNA.

يازارلۋ سونىمەن قاتار اۆياكومپانيالار زارداپ شەككەن جولاۋشىلارعا توقتاتىلعان رەيس بيلەتتەرىنىڭ قۇنىن تولىعىمەن قايتاراتىنىن اتاپ ءوتتى.

بۇعان دەيىن يران بيلىگى رەسپۋبليكانىڭ اۋە كەڭىستىگى بەيسەنبى كۇنى تاڭەرتەڭگە دەيىن جابىلاتىنىن حابارلاعان.

ەۋروپالىق اۆياتسيالىق قاۋىپسىزدىك اگەنتتىگى ءوز كەزەگىندە ەۋروپالىق اۋە كومپانيالارىنا كەم دەگەندە 31 -قازانعا دەيىن يراننىڭ اۋە كەڭىستىگىنە ۇشۋدان باس تارتۋدى ۇسىندى.

يزرايلدىڭ جاقىن ارادا يرانعا قارسى كەك قايتارامىز دەگەن قوقان-لوققىلارىنا قاراماستان يران اۋەجايلارىنداعى وپەراتسيالار قايتا جانداندى.

يراننىڭ يزرايلگە جاساعان زىمىران شابۋىلدارىنان كەيىن حالىقارالىق اۋە كومپانيالارى رەيستەر باعىتىن وزگەرتكەنىن بۇعان دەيىن حابارلاعان ەدىك.

قازاقستاندىق اۋە كومپانيالارى دا يراننىڭ اۋە كەڭىستىگىنەن اينالىپ ۇشاتىن بولادى. قازاقستان رەسپۋبليكاسى كولىك مينيسترلىگىنىڭ ازاماتتىق اۆياتسيا كوميتەتى تاياۋ شىعىستاعى جاعدايدىڭ ناشارلاۋىنا بايلانىستى وتاندىق اۋە كومپانيالارىنا يراننىڭ ۇستىنەن ۇشپاۋدى ۇسىندى. «ەير استانا» اۋە كومپانياسى يراندى اينالىپ ءوتىپ، ب ا ءا- گە ۇشاتىن بولادى.

اۆتور

ەركەجان سماعۇلوۆا