يران اۋە رەيستەرىنە قويىلعان شەكتەۋلەردى الىپ تاستادى

استانا. KAZINFORM - يزرايل شابۋىلىنا بايلانىستى اۋە كەڭىستىگىن جاپقان يران اۋە رەيستەرىن قايتا جانداندىردى. بۇل تۋرالى يران ازاماتتىق اۆياتسيا ۇيىمىنىڭ وكىلى جافار يازەرلۋ مالىمدەدى، دەپ حابارلايدى Anadolu اگەنتتىگى.

ونىڭ ايتۋىنشا، ەل بويىنشا توقتاتىلعان اۋە رەيستەرى 26-قازان كۇنى ساعات 9:00-دە قايتا باستالدى.

IRNA حابارلاعانداي، يراننىڭ سىرتقى ىستەر مينيسترلىگى ب ۇ ۇ جارعىسىنا سايكەس تەگەراننىڭ شەتەلدىك اگرەسسيالىق ارەكەتتەردەن ءوز ەلىن قورعاۋعا قۇقىعى مەن مىندەتى بار ەكەنىن مالىمدەدى.

«يران ءوزىن شەتەلدىك اگرەسسيادان قورعاۋعا قۇقىلى جانە مىندەتتى دەپ سانايدى، بۇل زاڭدى قورعانۋ قۇقىعى ب ۇ ۇ جارعىسىنىڭ 51-بابىندا كورسەتىلگەن»، - دەلىنگەن يران سىرتقى ىستەر مينيسترلىگىنىڭ مالىمدەمەسىندە.

مالىمدەمەدە يران يسلام رەسپۋبليكاسىنىڭ سىرتقى ىستەر مينيسترلىگى يرانداعى ءبىرقاتار اسكەري ورتالىقتارعا جاسالعان اگرەسسيالىق ارەكەتتەردى حالىقارالىق قۇقىق پەن ب ۇ ۇ جارعىسىن، اسىرەسە مەملەكەتتەردىڭ اۋماقتىق تۇتاستىعى مەن ۇلتتىق ەگەمەندىگىنە كۇش قولدانۋ نەمەسە كۇش قولدانۋ قاۋپىنە تىيىم سالۋ ءپرينتسيپىن انىق بۇزۋ دەپ سانايتىنى ايتىلعان.

بۇعان دەيىن يزرايل قورعانىس كۇشتەرى يراندىق اسكەري نىساندارعا تۇنگى اۋە شابۋىلدارىن اياقتاعانىن ايتىپ، يراندى قاقتىعىستىڭ ودان ءارى شيەلەنىسۋىنە قارسى تۇرۋعا دايىندالۋدى ەسكەرتكەن.

ەستەرىڭىزگە سالا كەتەيىك، 25-قازاننان 26-قازانعا قاراعان ءتۇنى ي س د «رەجيمنىڭ يزرايلگە قارسى ۇزدىكسىز شابۋىلدارى» دەپ اتاعان ارەكەتىنە جاۋاپ رەتىندە «يرانداعى اسكەري نىساندارعا ءدال سوققىلار جاساپ جاتقانىن» مالىمدەدى.

يزرايل اسكەرىنىڭ يرانعا جاۋابى تەگەران 1-قازاندا يزرايلگە جاپپاي شابۋىل جاساپ، 200-گە جۋىق بالليستيكالىق زىمىراندارمەن اتۋدان كەيىن كۇتىلگەن بولاتىن. بۇل ءوز كەزەگىندە يران قولدايتىن ليۆاندىق شيتتىك «حەزبوللا» توبىنىڭ جەتەكشىسى حاسان ناسراللانىڭ ولتىرىلۋىنە جاۋاپ رەتىندە جاسالدى. ول يزرايلدىكتەردىڭ بەيرۋتتەگى حەزبوللانىڭ شتاب-پاتەرىنە جاساعان سوققىسىنان قازا تاپتى.

يران اقپارات قۇرالدارى 26-قازانعا قاراعان ءتۇنى تەگەراندا جانە وعان جاقىن ورنالاسقان اسكەري بازالاردا ەكى ساعاتتان استام ۋاقىت بويى بىرنەشە جارىلىستىڭ ەكى تولقىنى بولعانىن حابارلادى. IRNA مەملەكەتتىك اقپارات اگەنتتىگىنىڭ (قازاقپارات سەرىكتەس اگەنتتىك) حابارلاۋىنشا، تەگەراننىڭ ورتالىعىندا زەنيتتىك اتىس ەستىلدى.

يران پارلامەنتىنىڭ (ءماجىلىس) ۇلتتىق قاۋىپسىزدىك كوميتەتىنىڭ مۇشەسى ەسمايل كوساري يزرايلدىڭ سوققىسى ايتارلىقتاي زيان كەلتىرمەگەنىنە قاراماستان، يراننىڭ جاۋاپ بەرەتىنىن مالىمدەدى.

اۆتور
ايجان سەرىكجان قىزى