يران ا ق ش- پەن جاناما كەلىسسوزدەر جۇرگىزۋگە دايىن - حامەنەي كەڭەسشىسى

استانا. KAZINFORM - تەگەران امەريكالىق تاراپتى تىڭداپ، ءوز شارتتارىن قويىپ، ءتيىستى شەشىم قابىلداۋدى جوسپارلاپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

يراننىڭ جوعارعى كوشباسشىسىنىڭ كەڭەسشىسى كامال حاررازي بەيسەنبى كۇنى تەگەران ا ق ش- پەن داۋلاردى رەتتەۋ ءۇشىن بارلىق ەسىكتى جاپپاعانىن جانە ۆاشينگتونمەن جاناما كەلىسسوزدەر جۇرگىزۋگە دايىن ەكەنىن مالىمدەدى. بۇل تۋرالى يراندىق ISNA اگەنتتىگى حابارلادى.

- يسلام رەسپۋبليكاسى بارلىق ەسىكتى جاپقان جوق. ول ا ق ش- پەن جاناما كەلىسسوزدەر جۇرگىزۋگە دايىن، باسقا تاراپتى باعالاپ، ءوز شارتتارىن قويىپ، ءتيىستى شەشىم قابىلداۋعا نيەتتى، - دەدى حاررازي.

حاررازي - حالىقارالىق قاتىناستار جونىندەگى ستراتەگيالىق كەڭەستىڭ باسشىسى جانە يراننىڭ بۇرىنعى سىرتقى ىستەر ءمينيسترى (1997- 2005).

ول ا ق ش شەنەۋنىكتەرىنىڭ بىردە «سوعىس»، بىردە «كەلىسسوزدەر» تۋرالى قاراما- قايشى سيگنالدار جىبەرىپ وتىرعانىن ايتتى.

- بۇگىندە ءبىز ا ق ش شەنەۋنىكتەرىنىڭ ارەكەتىنەن پسيحولوگيالىق سوعىستى نەمەسە «نە سوعىس، نە كەلىسسوزدەر» ساياساتىنىڭ شابىتىن بايقاپ وتىرمىز، - دەپ اتاپ ءوتتى حاررازي.

وسى ايدا ا ق ش پرەزيدەنتى دونالد ترامپ يراننىڭ جوعارعى كوشباسشىسى ءالي حامەنەيگە يادرولىق كەلىسسوزدەر جۇرگىزۋ تۋرالى تالاپ قويىلعان حات جىبەردى. بۇل حاتتا كەلىسسوزدەر تۋرالى ۇسىنىس پەن ەگەر يران باستامادان باس تارتىپ، يادرولىق باعدارلاماسىن جالعاستىرسا، سالدارى بولاتىنى تۋرالى ەسكەرتۋ قاتار بەرىلدى.

ترامپ حاتىندا يرانعا جاڭا كەلىسىم جاساۋ ءۇشىن ەكى اي مەرزىم بەلگىلەدى.

تەگەراننىڭ رەسمي ۇستانىمى وسى ۋاقىتقا دەيىن ا ق ش- تىڭ «ماكسيمالدى قىسىم» ساياساتى جالعاسىپ جاتقاندا، ترامپ اكىمشىلىگىمەن ىنتىماقتاستىق جاساماۋ بولدى. بۇل ساياسات يران يسلام رەسپۋبليكاسىنا قاتاڭ سانكسيالار سالۋدى كوزدەيدى.

حامەنەي ترامپتىڭ حاتى مەن كەلىسسوزدەر تۋرالى ۇسىنىسىن «يراندى كەلىسسوزدەردەن باس تارتاتىن ەتىپ كورسەتۋگە باعىتتالعان الداۋ» دەپ اتادى. دەگەنمەن، بىرنەشە ساعاتتان كەيىن يراننىڭ ب ۇ ۇ- داعى ميسسياسى X (بۇرىنعى Twitter) الەۋمەتتىك جەلىسىندە يراننىڭ يادرولىق باعدارلاماسى بويىنشا كەلىسسوزدەردى جوققا شىعارمايتىن مالىمدەمە جاريالادى.

14- ناۋرىزدا يران، رەسەي جانە قىتايدىڭ قاتىسۋىمەن يراندىق يادرولىق باعدارلاما بويىنشا كەلىسسوزدەر بەيجىڭدە ءوتتى.