ءبىراق تۇتىنۋشى بۇل تولەم تۋرالى الدىن الا حاباردار بولماسا، ونىڭ زاڭدىلىعىنا داۋ ايتۋعا قۇقىلى، - دەپ حابارلايدى Aikyn.kz سايتى.
كوپشىلىككە تانىس جاعداي: مەيرامحاناعا كەلگەن ادام 20 مىڭ تەڭگەگە تاماققا تاپسىرىس بەرەدى. ال ەسەپ ايىرىساتىن كەزدە شوتتاعى سوما 22 مىڭ تەڭگە بولىپ شىعادى. قوسىمشا 2 مىڭ تەڭگە قىزمەت كورسەتۋ اقىسى رەتىندە ەسەپتەلگەن.
قازاقستاننىڭ تۇتىنۋشىلاردىڭ قۇقىقتارىن قورعاۋ تۋرالى زاڭناماسىنا سايكەس، كەلۋشى قىزمەتتىڭ باعاسى مەن تولەم شارتتارى تۋرالى تولىق ءارى دۇرىس اقپارات الۋعا قۇقىلى. ەگەر مەيرامحانا قىزمەت كورسەتۋ اقىسىن بولەك الاتىن بولسا، بۇل تۋرالى تۇتىنۋشى تاپسىرىس بەرمەي تۇرىپ ءبىلۋى كەرەك. مۇنداي مالىمەت اس مازىرىندە نەمەسە كەلۋشىگە الدىن الا ۇسىنىلاتىن وزگە اقپاراتتا كورسەتىلۋى مۇمكىن. ال قىزمەت كورسەتۋ اقىسى تۋرالى ەشقانداي ەسكەرتۋ جاسالماي، قوسىمشا تولەم تەك شوت اكەلىنگەن كەزدە بەلگىلى بولسا، تۇتىنۋشى ونىڭ نەگىزىن ءتۇسىندىرۋدى تالاپ ەتە الادى.
دەگەنمەن قازاقستاندا مەيرامحانالاردىڭ قىزمەت كورسەتۋ اقىسىن الۋىنا جاپپاي تىيىم سالىنباعان. سوندىقتان مازىردە الدىن الا كورسەتىلگەن تولەم مەن كەلۋشىنىڭ كەلىسىمىنسىز كەيىن قوسىلعان اقىنى اجىراتا ءبىلۋ ماڭىزدى. تاعى ءبىر ماسەلە - داياشىعا بەرىلەتىن شايپۇل. ول قىزمەت كورسەتۋ اقىسىمەن بىردەي ەمەس. شايپۇلدى بەرۋ نەمەسە بەرمەۋ تۇتىنۋشىنىڭ ءوز ەركىندە.
ەگەر مەيرامحانا اكىمشىلىگى الدىن الا كەلىسىلمەگەن قوسىمشا تولەمدى الىپ تاستاۋدان باس تارتسا، كەلۋشى جازباشا شاعىم ءتۇسىرىپ، تۇتىنۋشىلاردىڭ قۇقىقتارىن قورعاۋ ورگاندارىنا جۇگىنە الادى. وسىلايشا، مەيرامحانا شوتىنداعى قوسىمشا 10 پايىزدىڭ زاڭدىلىعى ونىڭ مولشەرىنە عانا ەمەس، كەلۋشىگە تولەم تۋرالى قاشان جانە قالاي حابارلانعانىنا دا بايلانىستى.