22-قىركۇيەكتەگى جاعداي بويىنشا يران وڭتۇستىك پارس كەن ورنىنداعى بۇلىنگەن وندىرىستىك قۋاتتاردىڭ شامامەن 50 پايىزىن قالپىنا كەلتىردى. بۇل تۋرالى Fars اگەنتتىگى مۇناي ءمينيسترىنىڭ جوسپارلاۋ ماسەلەلەرى جونىندەگى ورىنباسارى احماد زەرااتكارعا سىلتەمە جاساپ حابارلادى.
- وڭتۇستىك پارستىڭ وندىرىستىك قۋاتى زاقىمدانعاننان كەيىن ولاردى قالپىنا كەلتىرۋ باعدارلاماسى ازىرلەندى. ءبىرقاتار قوندىرعى جوسپارلانعان مەرزىمنەن بۇرىن قايتا ىسكە قوسىلدى، - دەدى ول.
زەرااتكاردىڭ ايتۋىنشا، قالپىنا كەلتىرىلگەن نىسانداردا ءوندىرىس قايتا جاندانىپ، قالىپتى جۇمىسقا كىرىسكەن. ال وندىرىستىك قۋاتتاردىڭ نە سەبەپتى بۇلىنگەنى مەن كەلتىرىلگەن زالالدىڭ جالپى كولەمى ازىرگە ناقتىلانعان جوق.
يراندا قالپىنا كەلتىرۋ جۇمىستارىن قارجىلاندىرۋ ءۇشىن ىشكى قارجى كوزدەرى ەسەبىنەن ءتورت جوبا ازىرلەندى. بۇل قاراجات بۇلىنگەن نىسانداردى قالپىنا كەلتىرۋگە جۇمسالادى.
ءمينيستردىڭ ورىنباسارى وسى كەزەڭگە جوسپارلانعان جۇمىستاردىڭ تولىق ورىندالعانىن اتاپ ءوتتى. قالعان قالپىنا كەلتىرۋ جۇمىستارى قىس ماۋسىمى باستالعانعا دەيىن تولىعىمەن اياقتالماق.
زەرااتكار سونداي-اق ەنەرگەتيكالىق جۇيەگە تۇسەتىن جۇكتەمەنى ازايتۋ ءۇشىن تۇرعىنداردى ەلەكتر ەنەرگياسىن ۇقىپتى ءارى ۇنەمدى پايدالانۋعا شاقىردى.
وڭتۇستىك پارس - پارسى شىعاناعىندا ورنالاسقان، يران مەن قاتارعا ورتاق الەمدەگى ەڭ ءىرى تابيعي گاز كەن ورنىنىڭ يرانعا تيەسىلى بولىگى.
بۇل كەن ورنى ەلدەگى وندىرىلەتىن تابيعي گازدىڭ ەداۋىر بولىگىن قامتاماسىز ەتەدى.
تامىز ايىندا يران وڭتۇستىك پارس ايماعىنان تابيعي گازدىڭ مول قورىن انىقتاعانىن حابارلاعان ەدىك.