يران فۋتبول فەدەراتسياسى (FFIRI) ەل قۇراماسى تۋرنيرگە «ءوزىنىڭ سەنىمى، مادەنيەتى مەن قۇندىلىقتارىنان ەشقانداي باس تارتۋسىز» قاتىساتىنىن مالىمدەدى. سونىمەن قاتار قابىلداۋشى ەلدەر يراننىڭ الاڭداۋشىلىعىن ەسكەرۋى ءتيىس ەكەنىن اتاپ ءوتتى.
بۇل تالاپتار FFIRI پرەزيدەنتى مەحدي تادجنە وتكەن ايدا FIFA كونگرەسىنە قاتىسۋ ءۇشىن كاناداعا كىرۋگە رۇقسات بەرىلمەگەننەن كەيىن جاريا بولدى. كەيىن ول يران تاراپى ماۋسىم ايىندا ا ق ش، مەكسيكا جانە كانادادا وتەتىن الەم چەمپيوناتىنا قاتىستى FIFA-عا 10 تالاپ جولداعانىن ايتتى.
تالاپتاردىڭ قاتارىندا بارلىق فۋتبولشىلارعا، جاتتىقتىرۋشىلار مەن رەسمي تۇلعالارعا ۆيزا بەرۋ كەپىلدىگى بار. بۇل تالاپ يسلام رەۆوليۋتسياسى سا ق شىلار كورپۋسىندا (Islamic Revolutionary Guard Corps - IRGC) اسكەري قىزمەت وتكەرگەن ازاماتتارعا دا قاتىستى.
كانادا مەن ا ق ش IRGC ۇيىمىن تەرروريستىك قۇرىلىم دەپ تانىعان. كانادانىڭ مەحدي تادجدى ەلگە كىرگىزبەۋىنە دە ونىڭ اتالعان ۇيىممەن بايلانىسى سەبەپ بولعانى ايتىلدى.
يران سونداي-اق ۇلتتىق قۇراماعا قۇرمەتپەن قاراۋعا كەپىلدىك بەرۋدى تالاپ ەتىپ وتىر. ونىڭ ىشىندە ءانۇران ورىندالۋى مەن مەملەكەتتىك تۋدىڭ كوتەرىلۋى كەزىندەگى حاتتامانىڭ ساقتالۋى، اۋەجايلار، قوناقۇيلەر مەن ستاديوندارداعى قاۋىپسىزدىكتىڭ كۇشەيتىلۋى بار.
تالاپتاردىڭ ءبىر بولىگىن FIFA ورىنداۋى مۇمكىن. اسىرەسە تۋرنيردى ۇيىمداستىرۋ مەن دەلەگاتسيالارعا قاتىستى حاتتامالىق ماسەلەلەر فەدەراتسيا قۇزىرەتىنە كىرەدى. الايدا ۆيزا مەن شەكارالىق باقىلاۋ ماسەلەسى ا ق ش بيلىگىنىڭ قۇزىرىندا قالادى.
ا ق ش مەملەكەتتىك حاتشىسى ماركو رۋبيو يراندىق فۋتبولشىلاردىڭ تۋرنيرگە قاتىساتىنىن مالىمدەدى. ءبىراق IRGC مەن بايلانىسى بار تۇلعالار ا ق ش-قا كىرۋ كەزىندە شەكتەۋلەرگە تاپ بولۋى مۇمكىن ەكەنىن ەسكەرتتى.
بۇل جاعداي FIFA الدىندا كۇردەلى تاڭداۋ تۋعىزدى: ءبىر جاعىنان، بارلىق ىرىكتەۋدەن وتكەن قۇرامالاردىڭ قاتىسۋىن قامتاماسىز ەتۋ قاجەت، ەكىنشى جاعىنان، تەگەران مەن ۆاشينگتون اراسىنداعى ساياسي احۋالدى دا ەسكەرۋ كەرەك.
ەسكە سالساق، 28-اقپاندا ا ق ش پەن يزرايل يرانعا اۋقىمدى سوققى جاسادى. بۇعان جاۋاپ رەتىندە يران يزرايل مەن ا ق ش-تىڭ پارسى شىعاناعىنداعى وداقتاستارىنا شابۋىل جاسادى. سودان بەرى اسكەري قيمىلدار تۇراقسىز ءبىتىم اياسىندا نەگىزىنەن توقتاتىلعان.
يران تاراپىنىڭ كەيبىر وزگە تالاپتارىن ورىنداۋ دا قيىنعا سوعۋى مۇمكىن. اتاپ ايتقاندا، يراندىق رەسمي تۇلعالار جۋرناليستەردەن تەك «فۋتبولدىڭ تەحنيكالىق ماسەلەلەرىنە» قاتىستى سۇراقتار قويۋدى سۇراعان.
الايدا يران جاعدايىندا فۋتبول مەن ساياساتتىڭ ارا-جىگى انىق ەمەس. بۇل ناۋرىز ايىندا اۋستراليادا وتكەن ايەلدەر اراسىنداعى ازيا كۋبوگىندا ايقىن كورىندى. بىرنەشە يراندىق فۋتبولشى ساياسي باسپانا سۇراۋعا ارەكەت جاساپ، ديپلوماتيالىق جانجال تۋىنداعان.
بارلىق قايشىلىقتارعا قاراماستان، يراننىڭ تۋرنيردەن باس تارتاتىنىن بىلدىرەتىن ناقتى بەلگى ازىرگە جوق. قالىپتاسقان جاعداي FIFA، تەگەران جانە ا ق ش بيلىگى اراسىنداعى كەلىسسوزدەردىڭ بارعان سايىن كۇردەلەنە تۇسەتىنىن كورسەتىپ وتىر.
ايتا كەتەيىك، بۇعان دەيىن FIFA يراننىڭ چ م-2026 تۋرنيرىنە قاتىساتىنىن راستاعانىن جازدىق.
سونداي-اق حالىقارالىق فۋتبول ۇيىمى اۋعان بوسقىندارىنا دا حالىقارالىق تۋرنيردە باق سىناۋعا رۇقسات بەردى.