يران يسلام ريەۆوليۋتسياسى ساقشىلارى كورپۋسىنىڭ وكىلى حوسسەين موحەببي دۇيسەنبىدە ا ق ش جاڭا سوققى جاساعان جاعدايدا، يران كۇشتەرى قورعانىس تاسىلدەرىن وزگەرتىپ، قارىمتا شابۋىل جاساۋعا دايىن ەكەنىن مالىمدەدى.
ونىڭ ءسوزىن «ءال-الام» تەلەارناسى مەن Tasnim اگەنتتىگى تاراتتى.
- ەگەر ا ق ش قايتادان سوققى جاساسا، قورعانىسىمىز بەن قارىمتا ارەكەتىمىزدىڭ سيپاتى ەداۋىر وزگەرەدى. سوعىس قيمىلدارىنىڭ اۋماعى دا كەڭەيۋى مۇمكىن، - دەدى ول.
ونىڭ ايتۋىنشا، اسكەري قيمىلدار قايتا جالعاسسا، يران قارۋدىڭ جاڭا تۇرلەرىن قولدانىپ، سوققى جاسالاتىن نىساندار ءتىزىمىن وزگەرتپەك.
- ءبىز ۇرىس الاڭىنا مۇمكىندىگى جوعارى قارۋ-جاراقتىڭ جاڭا تۇرلەرىن قولدانامىز. ونىڭ الەۋەتى الەم جۇرتشىلىعىن تاڭعالدىرماق. بۇعان قوسا، وسى ۋاقىتقا دەيىن شابۋىل جاسالماعان نىسانالار دا انىقتالدى، - دەدى ي ر س ك وكىلى.
حوسسەين موحەببي ا ق ش- تىڭ سوعىستا تاريحي ءارى ماسقارا جاعدايدا جەڭىلگەنىن، الايدا ۆاشينگتوننىڭ مۇنى مويىنداۋعا ءازىر ەمەس ەكەنىن مالىمدەدى.
ول بۇعان دالەل رەتىندە يران ورمۋز بۇعازىن جاپقاننان كەيىن ۆاشينگتوننىڭ ونداعى كەمە قاتىناسىن قايتا جانداندىرا الماعانىن ايتتى.
يران يسلام ريەۆوليۋتسياسى ساقشىلار كورپۋسىنىڭ وكىلى ايماقتاعى امەريكالىق اسكەري بازالار يران سوققىلارىنان كەيىن قاۋىپسىز نىسان ءرولىن جوعالتقانىن ايتادى.
ونىڭ ايتۋىنشا، زىمىراندار پارسى شىعاناعى ەلدەرى مەن يراكتىڭ سولتۇستىگىندەگى ا ق ش بارلاۋ ورتالىقتارىنا دا تيگەن.
وسى مالىمدەمەلەر ايتىلعان تۇستا يران يسلام ريەۆوليۋتسياسى ساقشىلار كورپۋسى دۇيسەنبىدە ورمۋز بۇعازىنىڭ اۋە كەڭىستىگىندە ا ق ش- تا جاسالعان «MQ-1» ۇلگىسىندەگى دروننىڭ قاعىپ تۇسىرىلگەنىن مالىمدەدى. يران تاراپى اپپاراتتى كورپۋستىڭ جاڭا اۋە شابۋىلىنا قارسى قورعانىس جۇيەسى انىقتاعانىن ايتادى.
بۇعان دەيىن يران ا ق ش- قا سوعىستى توقتاتۋ ءۇشىن شارت قويعانى حابارلانعان بولاتىن.