ەير استانا 2-ماۋسىمدا ۇشاقتا بولعان كەلەڭسىز جاعدايعا قاتىستى تۇسىنىك بەردى

الماتى. قازاقپارات - Air Astana كومپانياسى الەۋمەتتىك جەلىدە تاراعان ۆيدەوعا قاتىستى تۇسىنىكتەمە بەردى. الەۋمەتتىك جەلىدە ۇشاق سالونىندا قامالىپ وتىرعان جولاۋشىلاردىڭ ۆيدەوسى تارادى. بەينەجازبادان ادامداردىڭ ءوزىن جايسىز سەزىنگەنىن بايقاۋعا بولادى.

2-ماۋسىم كۇنى «استانا- الماتى» باعىتىندا ۇشقان FlyArystan لوۋكوستەرىنىڭ KC 7332 رەيسىن Air Astana اۋەكومپانياسى ورىندادى. ۇشاق الماتى قالاسىنا كەشىگىپ 19:30-دا قوندى. اۋە كەمەسى تۇراققا جەتكەننەن كەيىن ەكيپاج جولاۋشىلاردى ۇشاقتان شىعارۋ ءۇشىن ارنايى تراپتى كۇتۋگە ءماجبۇر بولدى. تراپ جەتكىزۋ اۋەجايعا كەلگەن رەيستەردىڭ كوپتىگىنە بايلانىستى كەشىكتىرىلدى.

«كۇتىپ تۇرعاندا ۇشقىشتار مەن بورتسەرىكتەر جولاۋشىلارعا تراپ كەشىكتىرىلىپ جاتقانىن حابارلاپ، ۇشاقتاعى ىشەتىن سۋدى تاراتىپ بەردى. وكىنىشكە قاراي، ۇشاق قونعاننان كەيىن كونديتسيونەر جۇمىس ىستەمەي، جولاۋشى ايەل السىرەپ قالدى. بورتسەرىك كومەكتەسۋ ماقساتىندا وعان سۋ ىشكىزىپ، وتتەگى بالونىن الىپ كەلدى. بىرنەشە جولاۋشى ۇشاق ەسىگىن اشۋعا تىرىستى. ەكيپاج مۇشەلەرى قاۋىپسىزدىك ەرەجەلەرى بويىنشا ۇشاقتان ادام قۇلاپ كەتپەۋ ءۇشىن تراپ كەلگەنشە ەسىك اشۋعا بولمايتىنىن ءتۇسىندىردى»، - دەپ حابارلادى كومپانيادان.

الايدا جولۋشىلاردىڭ ءبىرى ەسكەرتۋگە قۇلاق اسپاي ساقتاندىرۋ قاقپاعىن اشىپ، ەسىكتىڭ تۇتقاسىن جوعارى كوتەردى. 20:15-تە كولىك تراپتى جەتكىزىپ، ولارمەن قوسا اۋەجايداعى جەلىلىك پوليتسيا قىزمەتكەرلەرى دە كەلدى.

«Air Astana اۋەكومپانياسى توبى كەلتىرگەن قولايسىزدىق ءۇشىن KC 7332 رەيسى جولاۋشىلارىنان كەشىرىم سۇرايدى. اۋەكومپانيا مەن اۋەجاي قىزمەتتەرى ىشكى تەكسەرۋ جۇرگىزەدى»، - دەلىنگەن حابارلامادا.

اۆتور
الما مۇقانوۆا