ينتەرنەتتەن تاعامعا تاپسىرىس بەرگەندە نەنى ەسكەرگەن ءجون

استانا. قازازاقپارات - بۇگىندە كەز كەلگەن ءونىمدى، سونىڭ ىشىندە تاعامدى دا ينتەرنەتتەن تاپسىرىس بەرىپ الدىرتۋعا بولاتىنى بەلگىلى. الايدا عالامتور ارقىلى تاماققا تاپسىرىس بەرۋ كەزىندە اباي بولعان ءجون، دەپ حابارلايدى BAQ. KZ.

بۇل تۋرالى استانا قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى مۇحامعالي ارىسپايەۆ ايتىپ بەردى.

«كۇماندى» سايتتار ارقىلى ۇيدە دايىندالعان اسپازدىق، كرەمدى-كونديتەرلىك ونىمدەردى جانە كونسەرۆىلەنگەن ونىمدەردى ساتىپ الماڭىز. قوعامدىق تاماقتاندىرۋ ونىمدەرى دايىندايتىن ستاتسيونارلىق وبەكتىنىڭ (وندىرىستىك سەحتىڭ) بار ەكەندىگىنە كوز جەتكىزىڭىز، وسى دەرەكتەردى 2 گيس قوسىمشاسى ارقىلى تەكسەرىڭىز. سونداي-اق پىكىرلەردى سايتىنان نەمەسە 2 گيس-تەن وقىڭىز، - دەپ ءتۇسىندىردى ۆەدومستۆو وكىلى.

سونىمەن قاتار ول اقشا اۋدارعاندا دا اباي بولۋدى ەسكەرتتى.

جەكە تۇلعالارعا تولەمدەردى اۋدارماڭىز، كاسىپكەردىڭ دەرەكتەمەلەرى مەن ساتۋشىنىڭ مەكەنجايى كورسەتىلگەن فيسكالدىق تۇبىرتەك الاتىن- المايتىنىڭىزدى تەكسەرىڭىز. تاپسىرىستى العان كەزدە مىنانى تەكسەرىڭىز:

قاپتامانىڭ (كونتەينەرلەردىڭ) تۇتاستىعى جانە لاستانۋىنىڭ بولماۋى؛
ونىمدەردە كورىنەتىن زاقىمداردىڭ بولماۋى (شەتەلدىك قوسىندىلار)؛
ءاربىر ورامادا مىنالاردى كورسەتەتىن ەتيكەتكانىڭ بولۋى: ىدىستىڭ ء(ونىمنىڭ) اتاۋىن، تاماق ءونىمىنىڭ اتاۋى مەن ءوندىرىسىنىڭ مەكەن- جايىن، دايىندالعان ۋاقىتى مەن كۇنىن، جارامدىلىق مەرزىمى مەن ساقتاۋ شارتتارىن، دايىنداۋ بويىنشا ۇسىنىستاردى (قاجەت بولعان جاعدايدا)؛
ءونىمنىڭ ساقتاۋ مەرزىمى مەن ساقتاۋ شارتتارى تۋرالى بولۋى قاجەت.
ساتىپ العان تاۋاردىڭ تۇبىرتەگىن 5 كۇن بويى ساقتاڭىز. ىستىق تاعامداردى بىردەن جەپ، كەلەسى كۇنگە قالدىرماعان دۇرىس. جەكە گيگيەنا ەرەجەلەرىن ساقتاڭىز. تاماقتان ۋلانۋ بەلگىلەرى پايدا بولعان جاعدايدا دەرەۋ دارىگەرگە جۇگىنىڭىز، - دەدى مۇحامعالي ارىسپايەۆ.