ينتەرنەت الاياقتىقتىڭ جاڭا ءتۇرى - كولىك ۇرلاۋ
استانا. KAZINFORM - ينتەرنەت الاياقتىقتىڭ جاڭا ءتۇرى - كولىك ۇرلاۋ. ءبىراق، وسى كۇنگە دەيىن ۇرلانعان كولىكتەردىڭ بىرەۋى دە تابىلماعان. بۇل تۋرالى «JibekJoly» ارناسىندا سالا ماماندارى ايتتى.
ينتەرنەت الاياقتىقتىڭ جاڭا ءتۇرى ءورشىپ تۇر. بۇل - لوگيستيكالىق كومپانيالار مەن كولىك يەلەرى اراسىنا جاسىرىن دەلدالدىق ورناتىپ، جاڭادان الىنعان اۆتولاردى ۇرلاۋ الاياقتىعى!
رەداكسيامىزعا «كولىگىمدى ۇرلاپ كەتتى، لوگيستيكالىق كومپانيا اتىن جامىلىپ، جالعان قۇجاتتار كورسەتتى» دەپ شاعىمدانعان، جاڭا ينتەرنەت الاياقتىق ءتۇرى تۋرالى ايتقان جابىرلەنۋشىلەر بار.
جابىرلەنۋشى جۇبان قاسىموۆ الماتى قالاسىنىڭ تۇرعىنى. لوگيستيكالىق كومپانياعا سەنىپ، سوڭعى ۇلگىدەگى Toyota 75 كولىگىن تىزگىندەۋ ءۇشىن قالتاسىنداعى سوڭعى اقشاسىن دەلدەلدىڭ قولىنا ۇستاتقان. ءبىراق، سايىپ كەلگەندە جۇمسالعان قاراجات تا، ەلگە اكەلىنگەن كولىك تە جوق، سان سوعىپ قالىپتى. سودان بەرى 8 اي وتكەن. كىرمەگەن كابينەتى مەن قاقپاعان ەسىگى قالماعان.
- بۇل - وسى جىلدىڭ قاڭتار ايىندا بولعان وقيعا. ءوزىمىز ارتىنان زەرتتەپ كوردىك. ءبىزدىڭ كولىك 17- قاڭتار كۇنى اقتاۋعا جەتكىزىلىپتى. الاياقتار رەسەيلىك تىركەۋ نومىرلەرىن تاعىپ، ورال جاققا قاراي الىپ كەتكەن. ول ازاماتتار وزدەرىن لوگيستيكالىق كومپانيا وكىلدەرىمىز دەپ تانىستىرعان بولاتىن. ارىز جازدىق. ءبىراق، ءالى سوت بولعان جوق، - دەيدى جابىرلەنۋشى.
ال، قۇقىق قورعاۋ سالاسىنىڭ وكىلدەرى مۇنداي فاكتىلەردىڭ بەلەڭ الىپ بارا جاتقانىن جاسىرمادى.
- وكىنىشكە وراي مۇنداي جاعدايلار ءجيى كەزدەسىپ جاتىر. بۇل بىرىنشىدەن ۇرلىق ەمەس، الاياقتىق فاكتىسىمەن سارالانادى. بۇنداي دەرەكتەر بويىنشا بىلتىرعى جىلى، بيىلعى جىلى پوليتسيا قىزمەتكەرلەرىمەن ءۇش توپ قۇرىقتالدى. ءبىرىنشى توپ بويىنشا 14 ادام، ەكىنشى توپ بويىنشا 7 ادام، ءۇشىنشى توپتا 3 ادام قامالىپ، جاۋاپكەرشىلىككە تارتىلۋدا. ءبىراق، كەيبىر جاعدايدا كولىكتەر تابىلماي جاتىر. جابىرلەنۋشىلەر ءبىر كۇن، ەكى كۇن وتكىزبەي بىزگە حابارلاسسا تابۋ مۇمكىندىگى كوپ بولاتىن ەدى، - دەدى ق ر ءى ءى م كريمينالدىق پوليتسيا دەپارتامەنتىنىڭ اسا ماڭىزدى ىستەر جونىندەگى اعا جەدەل ۋاكىلى نۇربول جەكسەنبەك باعدارلاما بارىسىندا.
ءيا، شاعىمدانۋشىلاردىڭ سالعىرتتىعىنان جوعالعان تەمىر تۇلپارلاردى تابۋ قيىن. دەر كەزىندە ارەكەت ەتپەگەندىكتەن كولىكتەردى الاياق دەلدالدار شەكارا اسىرىپ جىبەرەدى. مامانداردىڭ سوزىنشە الاياقتىقتىڭ باسىم بولىگى ازاماتتار كولىككە ونلاين تاپسىرىس بەرگەن جاعداي ورىن الادى.
قازىر ەلدە «Della» «FaFa» دەگەن پلاتفورمالار بار. تۇرعىندار سول ارقىلى كورشى ەلدەردەگى ارزان كولىكتەرگە تاپسىرىس بەرەدى. ال، بۇل پلاتفورمالاردى «جالعان دەلدالدار» تورۋىلداپ وتىرادى. جۇيە بىلاي جۇمىس ىستەيدى:
ازاماتتار وتىنىمدەرىن تىركەيدى؛
لوگيستيكالىق كومپانيانىڭ وكىلدەرى تاپسىرىستى قابىلدايدى؛
الاياقتار ساتىلاتىن كولىك بار دەپ، ديللەردى الدايدى؛
سوڭىندا ساتىپ الۋشى دا، لوگيستيكالىق كومپانيا دا سان سوعىپ قالادى.
جىل باسىنان بەرى كولىك الاياقتىعىمەن اينالىسقان 32 دەرەك تىركەلگەن. سونىڭ باسىم بولىگى ەلدەگى ءىرى مەگاپوليستەردە. كولىك تاسىمالىمەن اينالىساتىن كومپانيا وكىلدەرى مۇنداي جاعدايدا لوگيستيكالىق ۇيىمنىڭ قۇجاتتارىمەن جاقسىلاپ تانىسىپ الۋ كەرەك، - دەيدى. مەكەمە جۇمىسىنىڭ شىنايلىعىنا كوز جەتكىزگەننەن كەيىن عانا شارت جاساسۋ كەرەك.
- نەگىزىندە كولىك بولسىن، باسقا دا جۇك بولسىن تاسىمالدار الدىندا ادام بالاسى ءسال ساۋاتتى بولۋى كەرەك. بىزدە تاجىريبەدە بۇل كۇندەلىكتى كەزدەسەدى. كليەنتتەردىڭ كوبىسى اقشا ۇنەمدەۋ بارىسىندا وسى سايتتارعا سالادى. نەعۇرلىم لوگيستيكالىق كومپانيادان 20-30 مىڭ تەڭگە ارتىق تاپقاننان گورى، 50-60 مىڭ تەڭگە ۇنەمدەپ قالايىن دەگەن ماقساتتا كوبىسى سايتقا سالادى. ءبىراق، سايتتىڭ قاۋىپسىز ەكەنىن ەلەمەيدى. ال، الاياقتار وسىنىڭ بارلىعىن پايدالانادى، - دەيدى كولىك تاسىمالىمەن اينالىساتىن كومپانيا وكىلى گۇلنار قارشىعينا.
ايتا كەتەيىك، كولىك ۇرلىعى، اسىرەسە، ءىرى مەگاپوليستەردە - الماتى مەن استانا قالالارىندا كوپ تىركەلەدى. باس پروكۋراتۋرا جاريالاعان دەرەكتەر بويىنشا، قازاقستاندا اي سايىن ورتاشا 62 كولىك ۇرلانادى، سونىڭ ىشىندە 150-گە جۋىق ۇرلىق ماقساتسىز جۇزەگە اسىرىلعان ەكەن.
بۇعان دەيىن قاراعاندىلىق پوليتسەيلەر كولىك ۇرلىعىمەن اينالىسقانداردىڭ ءىزىن سۋىتپاي ۇستاپ، جاۋاپكەرشىلىككە تارتقانى تۋرالى جازعان بولاتىنبىز.