ينتەرنەت-الاياقتىق تۇرلەنىپ، جاڭا سيفرلىق شەشىمدەر قولدانىلا باستادى

قىزىلوردا. KAZINFORM - قىزىلوردا وبلىسىندا جىل باسىنان بەرى 186 ينتەرنەت-الاياقتىق دەرەگى بويىنشا قىلمىستىق ءىس تىركەلدى.

وبلىستىق پوليسيا دەپارتامەنتىنىڭ مالىمەتىنە سۇيەنسەك، سوتقا دەيىنگى تەرگەپ-تەكسەرۋ ناتيجەسىندە 66 قىلمىستىق ءىس اياقتالىپ، تۇپكىلىكتى شەشىم قابىلدانعان.

- ينتەرنەت-الاياقتىقتىڭ باسقا قىلمىستارعا قاراعاندا باستى ەرەكشەلىگى - جالپاق جۇرتتىڭ بارىنە قاتىستى جاسالۋىندا. قولىندا كومپيۋتەر، سمارتفون، پلانشەت بار ادام كەز كەلگەن ۋاقىتتا ارام پيعىلدىڭ قۇربانىنا اينالۋى مۇمكىن. قىلمىسكەرلەر ۋاقىت اعىمىنان قالماي، اقشا جىمقىرۋدىڭ ءتۇرلى جاڭا ءادىس-ءتاسىلىن قولدانۋعا كوشتى. اسىرەسە، ولار الەۋمەتتىك جەلىنىڭ مۇمكىندىگىن ۇتىمدى پايدالانىپ وتىر، - دەدى دەپارتامەنتتىڭ كيبەرپول باسقارماسى باستىعىنىڭ ورىنباسارى تيمۋر حاميتوۆ.

الاياقتىق جاساۋ جولىنىڭ تۇرلەنۋىنە بايلانىستى ونى اشۋ باعىتىندا دا جاڭا سيفرلىق شەشىمدەر كەڭىنەن قولدانىلا باستادى. كۇدىكتى ترانزاكتسيالار جاساندى ينتەللەكت كومەگىمەن انىقتالادى. ال ۇلتتىق بانك پەن ىشكى ىستەر مينيسترلىگىنىڭ «انتيفرود- ورتالىق» جۇيەسى الاياقتىق ترانزاكتسيالاردى دەر كەزىندە بۇعاتتاۋعا مۇمكىندىك بەرەدى. قىلمىسقا توسقاۋىل قويۋ ءۇشىن «KazDream» جانە «Seven Hills of Kazakhstan» مەكەمەلەرى ازىرلەگەن ارنايى باعدارلامالار دا بار.

ينتەرنەت الاياقتىڭ «قۇرىعى» ۇزىن. ول الەمنىڭ نەمەسە ەلدىڭ ءبىر تۇكپىرىندە وتىرىپ، ەكىنشى تۇكپىرىندەگى بىرەۋدى «تورىنا» تۇسىرە الادى. دەپارتامەنت وكىلى ءبىر عانا قوڭىراۋمەن تالايدى وپىق جەگىزگەن ءبىر- ەكى جايتتى مىسالعا كەلتىردى.

- بيىل ماۋسىم ايىندا استانادا Instagram ارقىلى ەل تۇرعىندارىنىڭ اقشاسىن ەسەلەپ بەرەمىن دەپ الداعان 2 ادامنان قۇرىلعان توپ قۇرىقتالدى. ولار ۋاقىتشا ۇستاۋ يزولياتورىنا قامالدى. قازىر 10 قىلمىستىق ءىس بويىنشا سوتقا دەيىنگى تەرگەپ-تەكسەرۋ ءجۇرىپ جاتىر. تاعى ءبىر مىسال، ينتەرنەت جەلىسى ارقىلى كولىك ساتاتىنىن ايتىپ، جالعان حابارلاندىرۋ ارقىلى الاياقتىق جاساپ جۇرگەن توپ قۇرىقتالىپ، قىلمىستىق ءىس سوتقا جولداندى. بۇدان بولەك، ءساۋىر ايىندا ەلوردالىق كۇدىكتىنىڭ رەسپۋبليكا ازاماتتارىنىڭ جەكە دەرەگىن يەمدەنىپ، ولاردى جارناما اگەنتتىگىنە تىركەپ، الاياقتىق جولمەن الىنعان اقشانى كريپتوۆاليۋتا ارقىلى ساتقانى انىقتالدى. وعان قاتىستى ءۇيقاماق تۇرىندەگى بۇلتارتپاۋ شاراسى قولدانىلدى. تەرگەۋشىلەر كۇدىكتىنىڭ باسقا وبلىستارداعى 18 قىلمىستىق ىسكە قاتىسى بار-جوعىن انىقتاۋعا كىرىستى، - دەدى تيمۋر حاميتوۆ.

وڭىردە ءتارتىپ ساقشىلارى ينتەرنەت-الاياقتىققا قارسى كۇرەستى كۇشەيتتى. ازاماتتاردىڭ قۇقىقتىق ساۋاتىن ارتتىرۋ جانە قىلمىستىڭ الدىن الۋ باعىتىندا جۇيەلى ءىس-شارالار اتقارىپ جاتىر. ال جۋىردا كيبەرقىلمىسپەن كۇرەس ورتالىعى جۇمىسىن باستادى. ونىڭ ەرەكشەلىگى، پوليتسيا ينتەرنەت- الاياق قۇربانى بولعانداردىڭ ارىزىن وسى ورتالىقتا قابىلداپ، وسىندا تەرگەيدى.

بۇعان دەيىن ءبىز پوليسەيلەر وڭىردە ينتەرنەت-الاياقتىقتىڭ بەلگىلى ءبىر تۇرلەرى جيىلەگەنىن ايتىپ دابىل قاققانىن، سوعان بايلانىستى قاۋىپسىزدىك شارالارىن قاپەرگە سالعان بولاتىن.