ينۆەستيتسيا، التىن، زياتكەرلىك مەنشىك: قازاقستاندىقتار تابىستى قايدان تاۋىپ جاتىر

استانا. KAZINFORM - جالپىعا بىردەي دەكلاراتسيانىڭ 3- كەزەڭىنىڭ قورىتىندىسى جاريالاندى. قازاقستاندىقتاردىڭ قانداي اكتيۆتەرى مەن جەكە مۇلىكتەرى بار؟

ول تۋرالى قارجى مينيسترلىگى مەملەكەتتىك كىرىستەر كوميتەتىنىڭ جەكە تۇلعالاردىڭ تابىستارىن اكىمشىلەندىرۋ باسقارماسىنىڭ باس ساراپشىسى ەرسايىن كوپتىلەۋ ۇلى ايتىپ بەردى.

«800 مىڭ ادام جالپى سوماسى 17097 ميلليارد تەڭگە قولما-قول اقشا قاراجاتىن كورسەتتى، 18853 ادام قازاقستان رەسپۋبليكاسىنان تىس جەرلەردە تىركەلگەن جىلجىمايتىن مۇلىك وبەكتىلەرى بارىن راستاپ دەكلاراتسيا تاپسىردى. سونىمەن قاتار 6656 ادام قازاقستان رەسپۋبليكاسىنان تىس جەردەگى كولىك قۇرالدارىن كورسەتىپ، 9521 ادام ازامات شەتەلدىك بانكتەردەگى بانك شوتتارى بار ەكەنىن كورسەتتى»، - دەدى ەرسايىن كوپتىلەۋ ۇلى ۆەدومستۆودا وتكەن باسپا ءسوز ءماسليحاتىندا.

كىرىستەر كوميتەتىنىڭ مالىمەتتەرىنە سۇيەنسەك، 22671 قازاقستاندىق دەبيتورلىق جانە كرەديتورلىق بەرەشەگىن، ونىڭ ىشىندە ەلدەن تىس جەرلەردە 4939 ادام سەنىمگەرلىك باسقارۋعا بەرىلگەن مۇلىك وبەكتىلەرى بارىن راستاعان. سونىمەن قوسا 4031 ادامنىڭ قازاقستاننان تىس جەرلەردە قۇرىلعان زاڭدى تۇلعانىڭ جارعىلىق كاپيتالى بار بولىپ شىقتى.

«16979 ازامات تۇرعىن ءۇي قۇرىلىسىنداعى، ونىڭ ىشىندە قازاقستان رەسپۋبليكاسىنان تىس جەرلەردە ۇلەسى بارىن كورسەتكەن. 5406 ادام ينۆەستيتسيالىق التىننىڭ بار ەكەنىن راستادى. ودان بولەك، 26184 قازاقستاندىق ەلدە جانە ودان تىس جەرلەردەگى 65238 باعالى قاعازىن ۇسىندى. 5779 وتانداسىمىزدىڭ 7197 ينۆەستيتسيالىق پاي قورى بار. سول سياقتى 4685 ادامنىڭ قازاقستانمەن ودان تىس جەرلەردە 8509 زياتكەرلىك مەنشىك جانە اۆتورلىق قۇقىق وبەكتىلەرى انىقتالدى. تاعى بولەك دەكلاراتسيادا 42794 ەل ازاماتىنىڭ قازاقستان مەن ونىڭ اۋماعىنان تىس جەرلەردە 1000 ا ە ك- تەن اساتىن مۇلىك وبەكتىلەرىن كورسەتتى»، - دەيدى ول.

بۇعان دەيىن حابارلاعانىمىزداي، 2024 -جىلعى 27-قازانداعى جاعداي بويىنشا 2,1 ميلليون ادام دەكلاراتسيا تاپسىردى.

اۆتور

داۋلەت ىزتىلەۋ