يننوۆاتسيالىق جوبالار: جاتتىقتىرۋشى روبوت، دروندار جانە نەيرودۋلىعا تۋرالى نە بىلەمىز

استانا. KAZINFORM - جاتتىقتىرۋشى روبوت ءيت، سان ءتۇرلى جاعدايعا قاجەتتى دروندار جانە نەيرو دۋلىعا - بۇل ەلىمىزدە جاساندى ينتەللەكت پەن روبوتوتەحنيكا سەگمەنتىندە جاسالىپ جاتقان وزىق تەحنولوگيالىق تۋىندىلار. بۇل تۋرالى Jibek joly تەلەارناسىنىڭ جاڭالىقتار قىزمەتىندە ايتتى.

تىڭ جوبالارلىق ونىمدەر بوس تۇرمايدى، ءبارى دە وندىرىس پەن قاۋىپسىزدىكتى نىعايتۋعا قولدانىلىپ جاتىر. سونداي-اق عارىش، مەديتسينا جانە قۇقىق سالالارىندا جاڭا مۇمكىندىكتەرگە جول اشىپ وتىر.

يننوۆاتسيالىق روبوتتاردىڭ قاتارىندا كۋكا جاتتىقتىرعىشى، روبوت ءيت جانە ءتۇرلى ماقساتتاعى دروندار بار. بۇل قۇرىلعىلار زاماناۋي تەحنولوگيالاردى مەڭگەرۋگە جانە تاجىريبەلىك داعدىلاردى دامىتۋعا مۇمكىندىك بەرەدى.

روبوت ءيتتىڭ 360 گرادۋسقا شولۋ جاسايتىن كامەراسى، جىلۋ ۆيزورى جانە گاز تالداعىشى بار. ول اۆتونومدى جانە قولمەن باسقارۋ رەجيمدەرىندە جۇمىس ىستەيدى. باعدارلاماشىلار بۇگىندە ونى قازاقشا سويلەتەتىن پروگرامما جازىپ جاتىر.

تاعى ءبىر يننوۆاتسيالىق جوبا - «سۋديالارعا ارنالعان سمارت- اناليتيكا». جاساندى ينتەللەكت پەن Big Data تەحنولوگيالارىنا نەگىزدەلگەن بۇل جۇيە سوت ۇدەرىستەرىنىڭ تيىمدىلىگىن ارتتىرىپ، ءادىل شەشىم قابىلداۋعا سەپتىگىن تيگىزەدى.

- قازىرگى جاساندى ينتەللەكت جۇيەلەر اشىلماعان، ايتىلماعان كەزەڭدە باستالعان جوبا. ىشىندەگى قۇجاتتاردى جاساندى ينتەللەكتىنىڭ كومەگىمەن اناليز جاساپ، سۋديالارعا كومەك كورمەتەدى. ادام ملن قۇجاتتى ءبىر ۋاقىتتا كورە المايدى، ءبىراق جۇيە ونى ىستەي الادى. مىسالى ملن قۇجاتتىڭ ورنىنا 10 قۇجاتتى ىرىكتەپ، اناليز جاساۋعا ىقپالىن تيگىزەدى، - دەيدى باعدارلاماشى بابۋر مۋحسينبايەۆ.

قازاقستاندا ونەركاسىپتىك قاۋىپسىزدىكتى ارتتىرۋ ماقساتىندا ازىرلەنىپ جاتقان يننوۆاتسيالىق جوبالاردىڭ تاعى ءبىرى - نەيرودۋلىعا. بۇل قۇرىلعى شارشاۋ مەن كۇيزەلىستى ەرتە انىقتاپ، وندىرىستىك قاتەلەردى ازايتۋعا كومەكتەسەدى. سونداي-اق، ونى استروناۆتتاردىڭ كوگنيتيۆتى جاعدايىن زەرتتەۋ ءۇشىن دە قولدانۋ جوسپارلانىپ وتىر.

- استروناۆتتاردىڭ اراسىندا نەگىزىنەن ەر ادامدار كوپ، ال عارىشتا ايەلدەر وتە از. ءبىزدىڭ ماقساتىمىز - العاشقى قازاق ايەلىن عارىشقا دايىنداۋ. بۇل جوبا قازاقستاننىڭ عارىش پەن مەديتسينا سالالارىنداعى بەدەلىن ارتتىرىپ، جوعارى تەحنولوگيالى جۇمىس ورىندارىن اشۋعا جانە ينۆەستيتسيا تارتۋعا ىقپال ەتەدى، - دەدى اقپاراتتىق تەحنولوگيالار جانە ينجەنەريا مەكتەبىنىڭ اسسيستەنت-پروفەسسورى الينا گۋتوريەۆا.

بۇل يننوۆاتسيالىق جوبالار ەلىمىزدىڭ عىلىمي الەۋەتىن الەمگە تانىتىپ، زاماناۋي مۇمكىندىكتەر اشادى. ولار ەلىمىزدىڭ عالامدىق باسەكەگە قابىلەتتىلىگىن ارتتىرىپ، جاستاردى ىنتالاندىراتىن قادامدارعا شابىتتاندىراتىنى ءسوزسىز.

اۆتور

نازىم بولەسوۆا