ينكليۋزيۆتى قوعامعا ءبىر قادام: قانت ديابەتى بار جاڭا باربي شىقتى

استانا. قازاقپارات - 9-شىلدە كۇنى Mattel كومپانياسى Barbie Fashionistas ينكليۋزيۆتى توپتاماسىنان جاڭا قۋىرشاقتى - 1-تيپتەگى قانت ديابەتى بار باربيدى تانىستىردى، دەپ حابارلايدى Kazinform اگەنتتىگىنىڭ ءتىلشىسى.

جاڭا قۋىرشاقتىڭ باستى ەرەكشەلىگى - قانت ديابەتىمەن ءومىر سۇرەتىن ادامدار قولداناتىن مەديتسينالىق قۇرىلعىلاردىڭ بولۋى: ينسۋلين پومپاسى، قانت دەڭگەيىن ۇزدىكسىز باقىلاۋ جۇيەسى (CGM) جانە باربيدىڭ فيرمالىق بەلگىسى - قىزعىلت جۇرەكشە تۇرىندەگى ارنايى مەديتسينالىق بەكىتكىش. قۋىرشاقتىڭ قولىندا قانداعى قانت دەڭگەيىن باقىلاۋعا ارنالعان قوسىمشاسى بار سمارتفون بار.

كومپانيا وكىلدەرىنىڭ ايتۋىنشا، نۇكتەلى كويلەك كيگەن باربي قانت ديابەتىنەن حابار بەرەدى. بۇل - اۋرۋدىڭ حالىقارالىق بەلگىسى بولىپ تابىلاتىن شەڭبەر مەن ونىڭ سيمۆولىنا اينالعان كوك ءتۇستىڭ ۇيلەسىمى.

- 1-تيپتەگى قانت ديابەتى بار العاشقى باربي قۋىرشاعىمەن تانىسىڭىزدار! ءبىز بۇل قۋىرشاقتى وسى قاۋىمداستىققا ارناپ جاساۋ ءۇشىن Breakthrough T1D (بۇرىنعى JDRF) ۇيىمىمەن سەرىكتەستىك ورناتتىق، - دەلىنگەن ءونىمنىڭ رەسمي سيپاتتاماسىندا.

جاڭا باربي - 2019 -جىلدان بەرى دامىپ كەلە جاتقان Barbie Fashionistas توپتاماسىنىڭ جالعاسى. بۇل توپتامادا سونىمەن قاتار داۋنا سيندرومى بار قۋىرشاقتار، مۇگەدەكتەر ارباسىنداعى قۋىرشاقتار، اق تاياقشامەن جۇرگەن زاعيپ قۋىرشاقتار، سونداي-اق ءتۇرلى تەرى رەڭكتەرى، دەنە پىشىندەرى جانە شاش تەكستۋراسى بار قۋىرشاقتار بار.

Fashionistas توپتاماسى بالالارعا ءارتۇرلى جارقىن وبرازداردى ۇسىنۋعا جانە ءوزىن-ءوزى كورسەتۋگە، ءوزىن قابىلداۋعا، وزگەلەرگە قۇرمەتپەن قاراۋعا شابىت بەرۋگە باعىتتالعان. قۋىرشاقتار 3 جاستان باستاپ بالالارعا ارنالعان جانە شەكتەۋلى تيراجبەن شىعارىلادى. ءار قۋىرشاق جەكە ساتىلادى.

ەسكە سالا كەتەيىك، كەيىنگى كۇندەرى قىتايدىڭ تانىمال ويىنشىق برەندى Labubu عا بايلانىستى جاڭالىقتار الەۋمەتتىك جەلىلەردە عانا ەمەس، قارجى نارىعىندا دا قىزۋ تالقىعا ءتۇستى. قوعامدا ۇلكەن قىزىعۋشىلىق تۋدىرعان بۇل برەندتىڭ اينالاسىنداعى جاعداي كۇرت وزگەرىپ، وعان قاتىستى اكتسيالار باعاسى كۇرت قۇلدىرادى.