يندونەزياداعى ليەۆوتوبي جانارتاۋى قايتا اتقىلاپ جاتىر

استانا. KAZINFORM - يندونەزيانىڭ شىعىس نۋسا تەنگگارا پروۆينتسياسىندا ورنالاسقان ليەۆوتوبي جانارتاۋى بەيسەنبى كۇنى قايتادان اتقىلاپ، كۇل باعاناسىن 5 مىڭ مەتر بيىكتىككە لاقتىرىپ، اۆياتسيالىق قاۋىپ- قاتەردىڭ ەڭ جوعارى دەڭگەيى جاريالاندى.

بۇل تۋرالى يندونەزيانىڭ جانارتاۋ جانە گەولوگيالىق اپات سالدارىن جويۋ ورتالىعى حابارلادى، دەپ جازادى شينحۋا.

جانارتاۋ جەرگىلىكتى ۋاقىت بويىنشا 10:48 دە بولعان. كۇل كراتەردىڭ باتىسىنا، وڭتۇستىك-باتىسىنا جانە سولتۇستىگىنە شاشىراعان.

ۆۋلكان وبسەرۆاتورياسى كراتەردىڭ ۇستىندە جانە اينالاسىندا 6 مىڭ مەتردەن تومەن ۇشۋعا تىيىم سالاتىن «قىزىل» (ەڭ جوعارى) اۆياتسيالىق قاۋىپتىلىك كودىن جاريالادى. ۇشاقتار ۇشۋ باعىتىنا كەدەرگى كەلتىرەتىن كۇل بۇلتتارىنا دا دايىن بولۋى كەرەك.

ليەۆوتوبي جانارتاۋى جەكسەنبى كۇنى كەشكە اتقىلاپ، سالدارىنان 10 ادام قازا تاۋىپ، 63 ادام جاراقاتتاندى. 4 مىڭنان استام تۇرعىن ۇيلەرىن تاستاپ كەتۋگە ءماجبۇر بولدى. ىستىق بۇلتتار مەن جانارتاۋلىق ماتەريالدار جۇزدەگەن ۇيلەر مەن عيماراتتاردى قيراتىپ، ايماقتا ءورت قاۋپىن تۋدىرىپ وتىر.

1584 مەترلىك ليەۆوتوبي تاۋى يندونەزياداعى 127 بەلسەندى جانارتاۋلاردىڭ ءبىرى. تىنىق مۇحيتىنىڭ ءورت ساقيناسىندا ورنالاسقان ەلدە جانارتاۋلىق بەلسەندىلىك ءجيى كەزدەسەدى.