يۋن سوك ەل كورەيلىك كومپانيالاردىڭ ەلىمىزدەگى گاز وڭدەۋ جوبالارىنا قاتىسقانىن قالايدى

استانا. KAZINFORM - كورەيا كومپانيالارى قازاقستاننىڭ نەگىزگى ۇلتتىق جوبالارىن جۇزەگە اسىرۋعا قاتىسقىسى كەلەدى.

بۇل تۋرالى اقوردادا مەملەكەت باسشىسى قاسىم-جومارت توقايەۆپەن كەلىسسوزدەردەن كەيىنگى بىرلەسكەن مالىمدەمە بارىسىندا وڭتۇستىك كورەيا پرەزيدەنتى يۋن سوك ەلمەن ايتتى.

«ۇلكەن الماتى اينالما جولى مەن شىمكەنت جىلۋ ەلەكتر ورتالىعىن سالۋ جوبالارىنىڭ ارقاسىندا ەكىجاقتى ىنتىماقتاستىق تابىستى جۇزەگە اسىرىلدى دەگەن ورتاق پىكىرگە كەلدىك. وسىنداي تابىستى مىسالداردىڭ نەگىزىندە ءبىز ەنەرگەتيكا جانە ينفراقۇرىلىمداردى كەڭەيتۋ سالالارىندا جاڭا جوبالار ىزدەۋ ءۇشىن ودان ارى ىنتىماقتاسۋعا ۋاعدالاستىق. وسىعان وراي مەن قازاقستان پرەزيدەنتىنە كومپانيالارىمىزدىڭ قازاقستاننىڭ نەگىزگى ۇلتتىق جوبالارىن، ونىڭ ىشىندە گاز وڭدەۋ زاۋىتتارىن سالۋ جوبالارىن ىسكە اسىرۋعا قاتىسىپ، ءوز ۇلەستەرىن قوسۋى ءۇشىن نازار اۋدارۋىن ءوتىندىم»، - دەدى كورەيا پرەزيدەنتى.

يۋن سوك ەل قازاقستان پرەزيدەنتىمەن كەلىسسوزدەر بارىسىندا سولتۇستىك كورەيانىڭ يادرولىق قارۋ پروبلەماسى دا تالقىعا تۇسكەنىن اتاپ ءوتتى.

«ەكى ەل دە سولتۇستىك كورەيانىڭ يادرولىق جانە زىمىران تەحنيكاسىن زاڭسىز ازىرلەۋىن ەرەكشە ايىپتادى جانە سولتۇستىك كورەيانى زاڭسىز قارجىلاندىرۋدى بۇعاتتاۋ بويىنشا حالىقارالىق قوعامداستىقتىڭ ىنتىماقتاستىعىنا قاتىسا بەرۋگە كەلىستى»، - دەدى ول.