يمپلانتتىڭ ورنىن باسۋى مۇمكىن: عالىمدار زەرتحانادا ادام ءتىسىن ءوسىرىپ شىعاردى

لوندونداعى كورولدىك كوللەدجدىڭ ماماندارى العاش رەت زەرتحانالىق جاعدايدا ادام ءتىسىن ءوسىردى، دەپ حابارلايدى Independent. زەرتتەۋدى جۇرگىزگەن مامانداردىڭ قاتارىندا كوللەدجدىڭ رەگەنەراتيۆتى ستوماتولوگيا ءبولىمىنىڭ ديرەكتورى دوكتور انا انگەلوۆا- ۆولپوني بار.

زەرتتەۋ ون جىلدان استام ۋاقىت بويى جۇرگىزىلگەن. عالىمداردىڭ پىكىرىنشە، بۇل جاڭالىق بولاشاقتا پلومبالار مەن ءتىس يمپلانتتارىنىڭ بالاماسىنا اينالۋى مۇمكىن. ماماندار ءتىستىڭ وسۋىنە قاجەتتى ورتاعا ۇقساس ماتەريال جاساپ شىعارعان. بۇل ورتا جاسۋشالارعا سيگنالدار جىبەرۋگە جانە ءتىستى قالىپتاستىرۋعا مۇمكىندىك بەرەدى. يمپلانتتاردان ايىرماشىلىعى، ناۋقاستىڭ ءوز جاسۋشالارىنان وسىرىلگەن ءتىس جاق سۇيەككە تابيعي تۇردە «ەنىپ»، ورنىعىپ كەتە الادى.

قازىر عالىمدار ەكى ءادىستى زەرتتەپ جاتىر. ءبىرىنشىسى - ءتىستى الدىمەن زەرتحانادا ءوسىرىپ، كەيىن جاق سۇيەككە يمپلانتاتسيالاۋ. ەكىنشىسى - ءتىستىڭ باستاپقى دامۋ كەزەڭىندە ونى ناۋقاستىڭ جاعىنا ورنالاستىرىپ، سول جەردە ءارى قاراي تابيعي تۇردە وسۋىنە مۇمكىندىك بەرۋ. بۇعان دەيىن جاپون ءتىس دارىگەرلەرى ءتىس پروتەزدەرى مەن يمپلانتتارعا بالاما رەتىندە جاڭا پرەپاراتتى سىناقتان وتكىزىپ جاتقانى حابارلانعان بولاتىن. قازان ايىندا كيوتو ۋنيۆەرسيتەتىنىڭ اۋرۋحاناسىندا كلينيكالىق سىناقتار باستالدى.

ەرەسەك ەرىكتىلەرگە جاسىرىن تىستەردىڭ ءوسۋىن ىنتالاندىرۋ ءۇشىن انتيدەنەلەر نەگىزىندەگى تاجىريبەلىك ءدارى ەنگىزىلدى. عالىمداردىڭ ايتۋىنشا، ادامداردا تىستەردىڭ ەكى جيىنتىعى (ءسۇت جانە تۇراقتى تىستەر) وسەدى. الايدا وساكا قالاسىنداعى كيتانو اۋرۋحاناسىنىڭ اۋىز حيرۋرگياسى ءبولىمىنىڭ مەڭگەرۋشىسى كاتسۋ تاكاحاشيدىڭ ايتۋىنشا، قىزىل يەكتىڭ استىندا «ۇيقىدا جاتقان» ءۇشىنشى بۋىن تىستەردىڭ باستاماسى بار.

جاپون دارىگەرلەرىنىڭ پىكىرىنشە، پروتەزدەۋگە قاراعاندا تابيعي تىستەردى قالپىنا كەلتىرۋ ارزانىراق ءارى پاتسيەنتكە از قولايسىزدىق تۋعىزادى.