يلون ماسكتىڭ ينتەرنەتى شالعاي اۋىلدارداعى ماسەلەنى قالاي شەشىپ جاتىر

تۇركىستان. KAZINFORM - تۇركىستان وبلىسىنداعى 330 مەكتەپكە «Starlink» سپۋتنيكتىك ينتەرنەت جۇيەسى قوسىلعان بولاتىن. «قازاقپارات» سايتىنىڭ ءتىلشىسى ءبىلىم وردالارىنداعى جوعارى جىلدامدىقتى ينتەرنەتتىڭ جۇمىس ىستەۋ بارىسىمەن تانىسىپ شىقتى.

يلون ماسكتىڭ ينتەرنەتى وڭىردەگى شالعاي اۋىلداردى دا قامتىپ وتىر. سونىڭ ءبىرى كەلەس اۋدانىنا قاراستى جۇزىمدىك اۋىلدىق وكرۋگىندەگى اقسۋ ەلدىمەكەنىندە ورنالاسقان №32 جالپى ءبىلىم بەرەتىن مەكتەپ. اۋىل شەكارالى ايماقتا ورنالاسقاندىقتان مۇندا ۇيالى بايلانىس جۇيەسى دۇرىس جۇمىس ىستەمەيدى. ال، عالامتورعا كىرۋدىڭ ءوزى مۇڭ. سوندىقتان مەكتەپكە سپۋتنيكتىك «Starlink» جۇيەسى ورناتىلعاندا ءبىرىنشى كەزەكتە وقۋشىلار مەن ۇستازدار قاتتى قۋانعان.

«وتكەن جىلى ىسكە قوسىلعان «Starlink» جۇيەسى توقتاۋسىز جۇمىس ىستەپ تۇر. ءتىپتى، مامىر ايىندا 4-9-سىنىپ وقۋشىلارى «وقۋ جەتىستىكتەرىن سىرتتاي باقىلاۋ» تەستىن ينتەرنەتپەن تاپسىردى. جۇيەدە قاتىپ قالۋ، اشىلماۋ دەگەن ماسەلەلەر جوق. مەكتەبىمىزدەگى ارنايى پاندىك كابينەتتەردە دە جوعارى جىلدامدىقتى ينتەرنەت ىسكە قوسىلىپ تۇر»، - دەدى مەكتەپ ديرەكتورىنىڭ وقۋ-ءىسى جونىندەگى ورىنباسار سۇڭقار ءابدىرايىم.

ال، قازىعۇرت اۋدانى اققۇم اۋىلىنىڭ تۇرعىندارى بۇگىنگە دەيىن ينتەرنەتتىڭ تاپشىلىعىن تارتىپ كەلگەن بولاتىن. ۇستازدار ەلەكتروندى جۋرنال تولتىرۋ ءۇشىن، قىر اسىپ، كورشى اۋىلعا دەيىن بارعان كەزدەرى بار. مەكتەپكە يلون ماسكتىڭ ينتەرنەتى كەلگەلى سول اۋىرتپالىقتىڭ بارشاسى دا ارتتى قالدى. قازىر مەكتەپتەگى جوعارى جىلدامدىقتى ينتەرنەتتى كەز كەلگەن ۋاقىتتا پايدالانۋعا بولادى.

«مەكتەبىمىزدەگى «Starlink» جۇمىس ىستەپ تۇر. اۋىلعا دا ۇيالى بايلانىس ورناتتى. 4G بار. ياعني، عالامتورعا نوۋتبۋكپەن دە، ۇيالى تەلەفونمەندە كىرە الامىز. مەكتەپتە اياقتاي الماعان جۇمىستارىمىزدى ۇيدە جالعاستىرامىز»- دەدى اققۇم جالپى ءبىلىم بەرەتىن مەكتەبىنىڭ ديرەكتورى جۇبان تايەۆ.

جەتىساي قالاسىنداعى ش. ءۋاليحانوۆ اتىنداعى جالپى ءبىلىم بەرەتىن مەكتەپتە 570 وقۋشى بار. مۇندا «Starlink» جۇيەسىنىڭ جىلدامدىعى 100-150 مبيت/س قۇرايدى. ۇستازدار ونلاين پلاتفورماداعى جارىستارعا ەركىن قاتىسا الاتىن مۇمكىندىك تۋعانىنا قۋانىپ ءجۇر.

«وتكەن جىلى جاڭا عيماراتقا كوشكەن بولاتىنبىز. سودان بىزگە سپۋتنيكتى «Starlink» جۇيەسىن ورناتىپ بەردى. ينتەرنەتكە كىرۋ جىلدامدىعى 10 ەسە ارتتى. بۇل وقۋشىلار مەن ۇستازدار ءۇشىن ىزدەنۋگە، جۇمىس ىستەۋگە ۇلكەن مۇمكىندىك دەپ بىلەمىن»، - دەدى ش. ۋاليحانوۆ اتىنداعى №2 ج ب ب م ديرەكتورى مەرۋەرت بەكەنوۆا.

وتىرار اۋدانىنىڭ ورتالىعى ءشاۋىردىر اۋىلىندا ورنالاسقان ءو. جانىبەكوۆ اتىنداعى №4 ليتسەي-ينتەرناتتا دا ينتەرنەت ۇلكەن ماسەلە بولعان. ءتىپتى، وقۋشىلار تەست تاپسىراتىن مەزگىلدە ينتەرنەت قايتا - قايتا قاتىپ قالا بەرەتىن. سودان قوسىمشا مودەم الىپ كەلىپ، ورناتۋعا ماجبۇرلىك تۋعان.

«ءبىزدىڭ مەكتەبىمىزدەگى 36 كابينەت تولىعىمەن جابدىقتالعان. ءار ءمۇعالىمنىڭ الدىندا مونوبلوك بار. لەد ەكران، ينتەراكتيۆتى تاقتامەن ساباق وتەمىز. وقۋشىلارىمىز ونلاين وليمپيادالارعا قاتىسىپ، تەست تاپسىرسا، ۇستازدارىمىز ەلەكتروندى جۋرنال تولتىرادى. ساباققا ىزدەنەدى. سوندىقتان ينتەرنەتتىڭ جىلدامدىعى اسا ماڭىزدى رول اتقارادى. «Starlink» كەلگەلى ەڭ باستىسى عالامتورعا كىرۋ جىلدامدىعى ارتتى. بۇرىن 30 مبيت/س وتىرساق، ءقازىر 80-نەن اسىپ جاتىر. جاقسى جۇمىس ىستەپ تۇر» - دەدى مەكتەپ ديرەكتورىنىڭ اقپاراتتاندىرۋ جونىندەگى ورىنباسارى نۇرزيلا ايداربەك.

تۇركىستان وبلىستىق ءبىلىم باسقارماسىنىڭ باسپا ءسوز قىزمەتى ۇسىنعان اقپاراتقا سۇيەنسەك، وڭىردەگى 911 مەملەكەتتىك مەكتەپتىڭ بارلىعى ينتەرنەت جەلىسىمەن قامتىلعان. ونىڭ ىشىندە 581 مەكتەپكە تالشىقتى- وپتيكالىق بايلانىس جەلىسى ارقىلى جىلدامدىعى 20-80 مبيت/س ينتەرنەت جەلىسى ورناتىلعان. جاقىندا تاعى 33 مەكتەپتى وپتيكامەن قامتۋ جوسپارلانىپ وتىر.

«330 مەكتەپ شالعاي جانە تاۋلى اۋماقتاردا ورنالاسۋىنا بايلانىستى، تەحنيكالىق مۇمكىندىگىنە قاراي جىلدامدىعى 512 ك ب/س - 20 مبيت/س قۇرايتىن تومەن جىلدامدىقتى ينتەرنەت جەلىسىندە وتىرعان بولاتىن. وسى ءبىلىم ۇيالارىنىڭ 329 ى «رەسپۋبليكالىق عارىشتىق بايلانىس ورتالىعى» ا ق SpaceX كومپانياسى ارقىلى «Starlink» سپۋتنيكتىك ينتەرنەتىنە قوسىلدى. قالعان 1 مەكتەپتە كۇردەلى جوندەۋ جۇمىستارىنا بايلانىستى توقتاتىلىپ تۇر. جاڭا وقۋ جىلىنا دەيىن ولدا جوعارى جىلدامدىقتى ينتەرنەتكە قوسىلاتىن بولادى. بۇل ءبىلىم ساپاسىنىڭ ارتۋىنا، وقۋشىلارى مەن ۇستازداردىڭ جان- جاقتى دامۋىنا مۇمكىندىك بەرەدى»، - دەيدى تۇركىستان وبلىستىق ءبىلىم باسقارماسىنىڭ رەسمي وكىلى نۇرلان سۇلتانبەك.