يلون ماسك: جاساندى ينتەللەكت بۇكىل ادامزاتتى باسىپ وزادى

استانا. KAZINFORM – ميللياردەر جانە تەحنولوگيالىق ماگنات يلون ماسك جاساندى ينتەللەكتتىڭ (ج ي) دامۋ قارقىنى تۋرالى پىكىر ءبىلدىردى، دەپ حابارلايدى FOX Business باسىلىمى.

ونىڭ مالىمدەۋىنشە، كەلەسى جىلى ج ي ادامنىڭ ينتەللەكتۋالدىق دەڭگەيىنە جەتۋى مۇمكىن.

كەلەر جىلى ج ي، جوعارى ىقتيمالدىقپەن، كەز كەلگەن جەكە ادامنان اقىلدى بولادى. ال 2029-جىلعا قاراي ج ي، ءسىرا، بۇكىل ادامزاتتى قوسا ەسەپتەگەندەگىدەن دە اقىلدى بولماق، - دەپ جازدى يلون ماسك ءوزىنىڭ X الەۋمەتتىك جەلىسىندەگى پاراقشاسىندا.

ماسك جاساندى ينتەللەكتتىڭ قارقىندى دامۋىنان تۋىندايتىن قاۋىپتەرگە قاتىستى الاڭداۋشىلىق ءبىلدىرىپ، بۇل تەحنولوگيانى قاتاڭ رەتتەۋ قاجەتتىگىن بىرنەشە مارتە اتاپ وتكەن. ونىڭ پىكىرىنشە، ج ي دۇرىس باقىلاۋعا الىنباسا، «وركەنيەتتىڭ كۇيرەۋىنە» اكەلۋى ىقتيمال.

بۇعان دەيىن Fox News تەلەارناسىنا بەرگەن سۇحباتىندا ماسك ChatGPT جانە باسقا دا ج ي چات-بوتتارىنىڭ ءبىرجاقتىلىعى مەن يدەولوگيالىق باعىتتىلىعىنا قارسى تۇرۋ ماقساتىندا «TruthGPT» دەپ اتالاتىن جەكە جاساندى ينتەللەكت جوباسىن ازىرلەۋ جوسپارى بار ەكەنىن مالىمدەگەن بولاتىن. ونىڭ ايتۋىنشا، يدەولوگياعا بەيىم باعدارلاماشىلار ج ي تەحنولوگيالارىن جالعان اقپارات تاراتۋ نەمەسە «وتىرىك ايتۋ» ءۇشىن پايدالانۋى مۇمكىن.

ج ي- ءدى وتىرىك ايتۋعا ۇيرەتۋ - وتە قاۋىپتى. ج ي- ءدىڭ وركەنيەتتى جويۋ قاۋپى، قانشالىقتى از بولسا دا، نازاردان تىس قالدىرۋعا بولمايدى، - دەپ ەسكەرتتى يلون ماسك.