ونىڭ پىكىرىنشە، مۇنداي تەڭسىزدىكتى ازايتۋ ءۇشىن مەملەكەتتەر ميللياردەرلەرگە سالىناتىن سالىقتى كوبەيتۋى كەرەك. بۇل تۋرالى Fortune باسىلىمى حابارلادى، دەپ حابارلايدى turkystan.kz.
گەيتس Financial Times باسىلىمىنا بەرگەن سۇحباتىندا جاساندى ينتەللەكتىنىڭ دامۋى الەم ەكونوميكاسىنا وراسان زور پايدا اكەلەتىنىن، الايدا بۇل تابىستىڭ باسىم بولىگى تەحنولوگيالىق كومپانيالاردىڭ يەلەرى مەن ينۆەستورلارىنا تيەسىلى بولۋى مۇمكىن ەكەنىن ايتتى.
ونىڭ سوزىنشە، باي ادامداردىڭ قايىرىمدىلىققا قارجى ءبولۋى قوعامداعى ەكونوميكالىق تەڭسىزدىكتى شەشۋگە جەتكىلىكسىز. بۇل مىندەتتى ەڭ الدىمەن مەملەكەتتەر ءوز موينىنا الۋى كەرەك.
«تەڭسىزدىكپەن كۇرەسۋدىڭ نەگىزگى جاۋاپكەرشىلىگى ءارقاشان ۇكىمەتتىڭ موينىندا بولادى. ءبىز ەرىكتى تۇردە جاسالاتىن قايىرىمدىلىقتى الەۋمەتتىك قورعاۋ جۇيەسىنىڭ ورنىنا قويا المايمىز»،-دەدى گەيتس.
كاسىپكەردىڭ پىكىرىنشە، جاساندى ينتەللەكت ەڭبەك نارىعىن وزگەرتىپ، كوپتەگەن ماماندىقتى اۆتوماتتاندىرعان سايىن سالىق جۇيەسىن دە قايتا قاراۋ قاجەت بولادى. اتاپ ايتقاندا، اسا ءىرى بايلىعى بار ادامدارعا سالىق سالۋدىڭ ءتيىمدى تەتىكتەرىن ەنگىزۋ ماڭىزدى.
گەيتس مۇنداي وزگەرىستەردەن كەيىن دە ميللياردەرلەردىڭ قايىرىمدىلىقپەن اينالىسۋعا مۇمكىندىگى بولاتىنىن اتاپ ءوتتى. الايدا ولاردىڭ كومەگى مەملەكەتتىك الەۋمەتتىك باعدارلامالاردى الماستىرماي، تولىقتىرۋى ءتيىس.
بيلل گەيتستىڭ ءوزى 2025-جىلى بايلىعىنىڭ باسىم بولىگىن، شامامەن 100 ميلليارد دوللاردى Gates Foundation قايىرىمدىلىق قورىنا بەرەتىنىن مالىمدەگەن. بۇل قاراجات 2045-جىلعا دەيىن دەنساۋلىق ساقتاۋ، ءبىلىم بەرۋ جانە كەدەيلىكپەن كۇرەس باعىتتارىنا جۇمسالماق.
سونىمەن قاتار گەيتس جاساندى ينتەللەكت پەن روبوتتاردى پايدالانۋعا دا ارنايى سالىق ەنگىزۋ يدەياسىن قولدايدى.
ونىڭ تۇسىندىرۋىنشە، كومپانيا ادامدى جۇمىسقا قابىلداعاندا ونىڭ جالاقىسىنا بايلانىستى سالىقتار تولەيدى. ال سول قىزمەتكەردى روبوتپەن الماستىرسا، جابدىقتى ساتىپ الۋ شىعىنىن سالىق ەسەبىندە شەگەرە الادى. كاسىپكەر مۇنداي جۇيە كومپانيالاردى ادام ەڭبەگىنەن باس تارتىپ، اۆتوماتتاندىرۋعا كوشۋگە ىنتالاندىرادى دەپ ەسەپتەيدى.
گەيتس روبوتتار مەن جاساندى ينتەللەكتىنى پايدالانۋعا سالىق سالۋ جۇمىس ورىندارىنىڭ جاپپاي قىسقارۋىن تەجەۋگە جانە قىزمەتكەرلەردى جاڭا ماماندىقتارعا دايارلاۋعا قارجى بولۋگە كومەكتەسۋى مۇمكىن دەيدى.
الايدا تەحنولوگيا سالاسىنداعى بارلىق كاسىپكەر بۇل ۇسىنىسپەن كەلىسپەيدى. ماسەلەن، Nvidia كومپانياسىنىڭ باسشىسى دجەنسەن حۋانگ باي ادامداردىڭ كوبىرەك سالىق تولەۋىنە قارسى ەمەس ەكەنىن ايتقانىمەن، روبوتتارعا ارنايى سالىق سالۋدى قولدامايدى.
ونىڭ پىكىرىنشە، جاساندى ينتەللەكتىنىڭ ەڭبەك نارىعىنا اسەرىن رەتتەۋدىڭ باسقا دا جولدارى بار.
ال گەيتس تەحنولوگيالىق پروگرەستىڭ پايداسىن قوعامنىڭ بارلىق مۇشەسى كورۋى كەرەك دەپ سانايدى. سوندىقتان جاساندى ينتەللەكت داۋىرىندە مەملەكەتتەر ءۇشىن باستى مىندەتتەردىڭ ءبىرى جاڭا تەحنولوگيالاردان تۇسەتىن تابىستى ءادىل ءبولۋ بولماق.