ىشكى ىستەر ورگاندارىنىڭ ارداگەرى 61 جاسىندا الەم چەمپيونى اتاندى
استانا. قازاقپارات – الپىستى القىمداعان سالا ارداگەرى - سامبو مەن دزيۋدودان ك س ر و-نىڭ جانە قازاق كۇرەسىنەن ق ر سپورت شەبەرى.
ىشكى ىستەر ورگاندارىنىڭ ارداگەرى، پوليتسيا پولكوۆنيگى مۇحسين دۇيسەنعاليەۆ 61 جاسىندا الەم چەمپيونى اتاندى.
بىلتىر ورال قالاسىندا سامبو كۇرەسىنەن سپورت شەبەرلەرى اراسىندا الەم چەمپيوناتى ءوتتى. وعان سالا ارداگەرى مۇحسين دۇيسەنعاليەۆ دا قاتىسىپ، 98 كەلى سالماق دارەجەسىندە الەم چەمپيونى اتاندى.
الەم چەمپيونى اتانۋمەن قاتار، ماڭعىستاۋ وبلىسى بويىنشا ارداگەرلەر اراسىندا «ۇزدىك سپورتشى» اتاعىنا يە بولدى. ال بيىل اقتاۋ قالاسىندا وتكەن سامبودان ازيا جانە وكەانيا سپورت شەبەرلەرى اراسىنداعى چەمپيوناتتا توپ جارىپ، تاعى دا الەم چەمپيونى تۇعىرىنان كورىندى.
الپىستى القىمداعان سالا ارداگەرى - سامبو مەن دزيۋدودان ك س ر و-نىڭ جانە قازاق كۇرەسىنەن ق ر سپورت شەبەرى. 1984-2018 -جىلدار ارالىعىندا ىشكى ىستەر ورگاندارىندا قىزمەت اتقارعان.
«سپورت - مەنىڭ ءومىر سالتىم. مەكتەپ جاسىنان بەرى سپورتقا جاقىن بولدىم، قارسىلاستارىمدى جەڭۋ ءۇشىن ءاردايىم جاتتىعۋدان قول ۇزبەدىم. ءتىپتى، وسى ىشكى ىستەر سالاسىنا كەلۋىمە دە سپورت سەبەپشى بولدى. پوليتسيا قىزمەتكەرلەرىنىڭ قاتارىندا ءجۇرىپ تە، تالاي قىلمىستىڭ الدىن الۋعا ارەكەت جاساپ، ونىڭ بولماۋى ءۇشىن تويتارىس بەردىك»، - دەدى سالا ارداگەرى.
مۇحسين دۇيسەنعاليەۆتىڭ ۇلى تالعات قۋاناي دا ءتارتىپ ساقشىلارىنىڭ قاتارىندا. ول دا تۋرا اكەسى سەكىلدى بالا كەزىنەن سپورتقا جاقىن. سامبو مەن دزيۋدودان سپورت شەبەرى. سامبو كۇرەسىنەن ق ر ىشكى ىستەر مينيسترلىگى جانە ازيا جانە وكەانيا چەمپيوناتىندا چەمپيون اتانعان. بۇگىندە ول ماڭعىستاۋ وبلىسى پوليتسيا دەپارتامەنتى جىلدام قيمىلدايتىن ارنايى جاساق كومانديرىنىڭ ورىنباسارى لاۋازىمىندا قىزمەت ەتەدى.
2018 -جىلى ىشكى ىستەر ورگاندارىنان زەينەتكەرلىككە شىققان مۇحسين قۋاناي ۇلى ءالى كۇنگە دەيىن سالاداعى وزگەرىستەرگە قۇلاق تۇرە جۇرەدى.