ىشكى ىستەر ورگاندارىنداعى وڭ وزگەرىستەردى قوعام كەي كەزدە بايقامايدى - مارات قوجايەۆ

استانا. KAZINFORM - ىشكى ىستەر ءمينيسترىنىڭ بۇرىنعى ءبىرىنشى ورىنباسارى جانە جاقىندا سەناتور بولعان مارات قوجايەۆ تالعارداعى وقيعادان كەيىن وڭىردەگى ىشكى ىستەر ورگاندارىنداعى وزگەرىسكە قاتىستى پىكىر ءبىلدىردى.

«بۇل ءىستى مينيستر ءوزىنىڭ تىكەلەي باقىلاۋىنا الدى. جاقىندا عانا سول وڭىردەگى ىشكى ىستەر سالاسىنداعى دەپارتامەنتتىڭ باسشىلىعى، جاۋاپتى قىزمەتكەرلەرى اۋىستى. ەندى ءسال سابىرلىق تانىتىپ، قىلمىستىق ىستەگى تەرگەۋ امالدارى اياقتالعانشا ءسال كۇتەيىك. وسىدان كەيىن جالپى ناتيجەلەر تۋرالى سويلەسەمىز»، - دەدى م. قوجايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ پايىمىنشا، قازىر ايتىلعان ءاربىر پىكىر تەرگەۋگە تەرىس اسەر ەتۋى مۇمكىن.

سونىمەن قاتار سەناتور ىشكى ىستەر ورگاندارى سالاسىن جەتىلدىرۋگە قاتىستى وزگەرىستەر ءجيى بولاتىنىن ايتتى.

«ونى كەي كەزدە بايقاماي جاتاسىزدار. قازىر ناشاقورلىقپەن كۇرەس ماسەلەسى بەلسەندى تۇردە كوتەرىلىپ ءجۇر. سوندىقتان جاقىندا ىشكى ىستەر مينيسترلىگىنىڭ قۇرىلىمىندا ەسىرتكى قىلمىسىنا قارسى ءىس-قيمىل كوميتەتى قۇرىلدى. جالپى، سالاداعى ماسەلەلەردىڭ بارلىعى رەتىمەن شەشىلىپ جاتىر دەپ ايتا الامىن. ءار كەزەڭدە ءوزىنىڭ قيىندىقتارى مەن سىناقتارى بولادى. ونىڭ بارىنە قاتىستى شەشىمىن ىزدەپ، ەڭسەرىلە بەرەدى»، - دەدى دەپۋتات.

مارات قوجايەۆ ءوزىنىڭ ويىندا جۇرگەن ۇسىنىستاردى الداعى ۋاقىتتا سەناتور رەتىندە جاريالايتىنىن ايتتى.

ەسكە سالايىق، 4- قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز.

اۆتور

رۋسلان عابباسوۆ