ىشكى ىستەر مينيسترلىگى «عاسىر» وقىتۋ ورتالىعى جونىندە پىكىر ءبىلدىردى

استانا. KAZINFORM - «عاسىر» وقۋ ورتالىعىنىڭ الاياقتىق ارەكەتتەرىنە بايلانىستى پوليتسياعا ۇجىمدىق شاعىم ءتۇستى، دەپ حابارلايدى Kazinform ق ر ىشكى ىستەر مينيسترلىگىنە سىلتەمە جاساپ.

تەرگەۋ بارىسىندا انىقتالعانداي، ازاماتتار شەتەلدىك جوعارى وقۋ ورىندارىنا تۇسۋگە دايىندىق كۋرستارىنا جازىلىپ، كەلىسىمشارتقا قول قويىپ، تولىقتاي تولەم جاساعان. الايدا وقۋ پروتسەسى مۇلدە باستالماعان، كورسەتىلۋى ءتيىس ءبىلىم بەرۋ قىزمەتتەرى ۇسىنىلماعان.

- ازاماتتاردىڭ ۇجىمدىق ءوتىنىشى نەگىزىندە ق ر قىلمىستىق كودەكسىنىڭ 190-بابى «الاياقتىق» بويىنشا قىلمىستىق ءىس قوزعالدى. تەرگەۋ بارىسىندا وقىتۋ ورتالىعىندا ءبىلىم الۋ ءۇشىن تولەم جاساعان ازاماتتاردىڭ ۋادە ەتىلگەن وقۋ قىزمەتتەرىن الماعانى انىقتالدى. اتالعان فاكتى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر، - دەپ جازىلعان ىشكى ىستەر مينيسترلىگىنىڭ تەلەگرام-ارناسىندا.

اتالعان دەرەك بويىنشا قىلمىستىق ءىس قوزعالدى. قازىر تەرگەۋ امالدارى جۇرگىزىلىپ جاتىر. تەرگەۋ بارىسى استانا قالالىق پ د باسشىلىعىنىڭ باقىلاۋىندا.

كەشە ەلوردالىق اتا-انالاردىڭ Gasyr Foundation ءبىلىم بەرۋ ورتالىعىنا جاپپاي شاعىمدانعانىن حابارلاعان ەدىك. ەلدەگى ءبىلىم بەرۋ ورتالىقتارى مەملەكەتتىك ورگانداردىڭ باقىلاۋىنان تىس قالىپ وتىر.