ىشكى ىستەر ءمينيسترلىگى استانادا مەكتەپتىڭ جانىنان ءولى تابىلعان قىزعا قاتىستى تۇسىنىك بەردى

استانا. KAZINFORM - استاناداعى مەكتەپتىڭ جانىنان ءولى تابىلعان قىزدىڭ ءىسىن پوليتسيا تەرگەپ جاتىر. بۇل تۋرالى ىشكى ىستەر ءمينيسترىنىڭ ورىنباسارى يگور لەپەحا ايتتى.

«سۋيتسيدكە يتەرمەلەۋ بويىنشا قىلمىستىق ءىس قوزعالدى. قازىر باسقا اقپارات جوق. كۇدىكتى ازىرشە انىقتالمادى. سىزگە وقيعانىڭ ءمان-جايىن تولىق ايتا المايمىن»، - دەدى يگور لەپەحا سەناتتىڭ جالپى وتىرىسىنان سوڭ.

بۇعان دەيىن ەلوردادا مەكتەپتىڭ جانىنان قىز ءولى تابىلعانى حابارلانعان ەدى.

بۇل دەرەككە قاتىستى مەكتەپ وقۋشىلارى ءوز شىندىقتارىن ايتقان بولاتىن.

«ول 16-مەكتەپتە وقىدى، ءبىز مىنا 5-گيمنازيادانبىز. اۋرەليانى بۇرىننان تانيمىز، بىزگە 16-17 جاستامىن دەپ ايتاتىن. كەشە عانا ونىڭ 13 جاستا ەكەنىن بىلدىك. جاقىن كۇندەرى تۋعان كۇنىم دەپ ءجۇردى. ول شىلىم، ۆەيپتەر شەگەتىن. مىنا قيراعان عيماراتقا ءبىزدى شاقىرعان. ءوزى وسىنىڭ ماڭايىندا گاز بالونىن يىسكەپ وتىردى. اس ۇيگە، پەشكە ارنالعان شاعىن گاز بالونىن پاكەتكە سەۋىپ، يىسكەيدى. ول باستاپقىدا كۇنىنە بەس بانكادان پايدالاناتىنمىن، كەيىننەن مولشەرىن 2-3 بانكاعا ازايتتىم دەگەن. ەستۋىمىزشە، ولەر الدىندا دوستارىمەن بىرگە «سەليننىي» دۇكەنىنىڭ جەرتولەسىنە كىرىپ، ۇلكەن گاز بالونىن ساتىپ العان. دوستارى، ءبارى «پەرەدوزيروۆكا» دەيدى»، - دەيدى وقۋشىلار.