بۇل ءوسىم قازاقستاندىقتاردىڭ ەل ىشىندە دەمالۋعا قىزىعۋشىلىعى ارتقانىن جانە تۋريستىك ينفراقۇرىلىمنىڭ كەڭەيىپ جاتقانىن كورسەتەدى.
ىشكى ءتۋريزمنىڭ ءوسۋىن تەك شەتەلگە شىعۋدىڭ قىمباتتاۋىمەن ءتۇسىندىرۋ دۇرىس ەمەس. 2025-جىلى قازاقستاندىقتاردىڭ شەتەلگە ساپارلارى 11,8 ميلليون بولعان. بۇل حالىقتىڭ شەتەلدە دەمالۋعا دەگەن سۇرانىسى دا ساقتالعانىن كورسەتەدى. سونىمەن قاتار شەتەلگە شىعۋ ستاتيستيكاسىنا دەمالىستان بولەك، جۇمىس، وقۋ، ساۋدا جانە تۋىستارعا بارۋ سياقتى ساپارلار دا كىرەدى.
قازاقستاندا بۋراباي، الاكول، ماڭعىستاۋ، تۇركىستان جانە الماتى تاۋلارى سەكىلدى تانىمال باعىتتارمەن قاتار، جاڭا تۋريستىك ورىندار دا دامىپ كەلەدى. 2026-جىلعا ارنالعان مادەني-تۋريستىك كۇنتىزبەگە ەلىمىزدىڭ 20 وڭىرىندە وتەتىن 55 ءىرى ءىس-شارا ەنگىزىلگەن. ولاردىڭ قاتارىندا مادەني، سپورتتىق، گاسترونوميالىق جانە ەكولوگيالىق شارالار بار.
قىسقى تۋريزم دە ىشكى سۇرانىستىڭ ارتۋىنا ىقپال ەتۋدە. مىسالى، 2024-جىلى شىمبۇلاققا 1,5 ميلليون ادام بارعان. ونىڭ 800 مىڭى قىس مەزگىلىندە، 700 مىڭى جازدا كەلگەن. بۇل تاۋلى ايماقتاردىڭ تەك قىسقى سپورتپەن شەكتەلمەي، جىل بويى تۋريستەردى قابىلداي الاتىنىن كورسەتەدى. الماتى تاۋ كلاستەرىن دامىتۋ اياسىندا جاڭا شاڭعى تراسسالارى مەن اسپالى جولدار سالۋ جوسپارلانعان.
ءتۋريزمنىڭ دامۋىنا جول جانە كولىك ينفراقۇرىلىمى دا اسەر ەتەدى. بيىل تانىمال تۋريستىك باعىتتارعا اپاراتىن 11 مىڭ شاقىرىم جولدا جوندەۋ جۇمىستارى جۇرگىزىلىپ جاتىر. سونىمەن بىرگە الاكولگە قوسىمشا پويىزدار قاتىناپ، كاتونقاراعاي، زايسان جانە كەندىرلىدە جاڭا اۋەجايلار سالۋ جوسپارلانعان. مۇنداي جوبالار تۋريستىك ورىندارعا جەتۋدى جەڭىلدەتىپ، ساياحاتتاۋشىلار سانىن ارتتىرۋعا مۇمكىندىك بەرەدى.
2025-جىلى قازاقستاندىقتاردىڭ ىشكى ساپارلارعا جۇمساعان قاراجاتى 659,2 ميلليارد تەڭگەگە جەتتى. بۇل 2024-جىلمەن سالىستىرعاندا %13,1 عا كوپ. دەگەنمەن، ينفلياتسيانىڭ %12,3 بولعانىن ەسكەرسەك، شىعىنداردىڭ ناقتى ءوسىمى ايتارلىقتاي جوعارى ەمەس. تۋريستىك قاراجاتتىڭ ەداۋىر بولىگى كولىككە، تاماققا جانە تاۋارلارعا جۇمسالادى. سوندىقتان تۋريستەر سانىنىڭ كوبەيۋى تۋريزم بيزنەسىنىڭ تابىسى دا ءدال سونداي قارقىنمەن ءوستى دەگەندى بىلدىرمەيدى.
سونىمەن قاتار تۋريستىك نىسانداردىڭ كوبەيۋى تابيعاتقا تۇسەتىن سالماقتى ارتتىرۋى مۇمكىن. مىسالى، الماتىداعى كوك-جايلاۋ اۋماعىندا تاۋ كۋرورتىن دامىتۋ ماسەلەسى قوعامدىق تالقىلاۋعا ءتۇستى. بۇل ءتۋريزمدى دامىتۋمەن قاتار، تابيعي اۋماقتاردى قورعاۋدىڭ دا ماڭىزدى ەكەنىن كورسەتەدى.
2025-جىلى قازاقستاننىڭ تۋريزم سالاسىنا 1,25 تريلليون تەڭگە ينۆەستيتسيا تارتىلىپ، بيۋدجەتكە 630 ميلليارد تەڭگەدەن استام سالىق تۇسكەن.
قورىتىندىلاي ايتقاندا، ىشكى ءتۋريزمنىڭ ءوسۋى تەك شەتەلگە شىعۋدىڭ قىمباتتاۋىنا بايلانىستى ەمەس. بۇعان ەل ىشىندەگى تۋريستىك باعىتتاردىڭ كوبەيۋى، ينفراقۇرىلىمنىڭ جاقسارۋى جانە دەمالىس تۇرلەرىنىڭ ءارتاراپتانۋى اسەر ەتىپ وتىر. ەندىگى ماڭىزدى مىندەت - تۋريستەر سانىن ارتتىرۋمەن قاتار، قىزمەت ساپاسىن جاقسارتىپ، تۋريزمنەن تۇسەتىن ەكونوميكالىق پايدانى كوبەيتۋ جانە تابيعاتتى ساقتاۋ.