ىشكى ساۋدا ەرەجەلەرىنە وزگەرىستەر ەنگىزىلدى

استانا. قازاقپارات - 2025 -جىلعى 29-شىلدەدەگى ساۋدا جانە ينتەگراتسيا ءمينيسترىنىڭ بۇيرىعىمەن ىشكى ساۋدا ەرەجەلەرىنە، سونداي-اق ساۋدا نارىعى قىزمەتىن ۇيىمداستىرۋ قاعيداسىنا، ونىڭ ىشىندە اۋماعى، جابدىقتاۋ جانە قامتاماسىز ەتۋگە قويىلاتىن تالاپتارعا وزگەرىستەر ەنگىزىلدى.

ەرەجەدە ناقتىلاعانداي، ىشكى ساۋدانى دامىتۋ جانە قازاقستاندىق تاۋارلاردىڭ، جۇمىس جانە كورسەتىلەتىن قىزمەتتىڭ باسەكەگە قابىلەتتىلىگىن ارتتىرۋ ماقساتىندا ۇلتتىق مۇددەنى ەسكەرە وتىرىپ، جەرگىلىكتى اتقارۋشى ورگاندار ساۋدا قىزمەتىنە قولايلى جاعداي جاساۋ جونىندە شارالار ازىرلەيدى.

ىشكى ساۋدا سۋبەكتىلەرى مەن ساۋدا جەلىلەرى ساۋدا نارىعى ارقىلى تاۋارلاردى وتكىزۋ كەزىندە مىندەتتى:

- قازاقستاندا جاسالعان تاۋارلاردى ارنايى ماڭدايشا نەمەسە «قازاقستاندا جاسالعان» دەگەن جازۋمەن بەلگىلەۋ. بۇل جازۋدى قاتار ورنالاسقان بىرنەشە وتاندىق تاۋارعا قولدانۋعا بولادى؛
- قازاقستاندا جاسالعان تاۋارلاردى «قازاقستاندا جاسالعان» دەگەن جازۋمەن قاتار، سۇرانىسى جوعارى ونىمدەردىڭ جانىندا كروسس- مەرچەندايزينگ ادىسىمەن ورنالاستىرۋ؛
- قازاقستاندا جاسالعان ازىق-تۇلىكتى جالپى ساۋدا الاڭىنىڭ جانە ازىق- تۇلىككە ارنالعان سورەلەر كەڭىستىگىنىڭ كەمىندە 30 پايىزىن الاتىنداي ەتىپ ورنالاستىرۋ؛
- وتاندىق تاۋارلاردى ۆيزۋالدى جانە فيزيكالىق تۇرعىدان قولجەتىمدى ورىندارعا (كوزگە كورىنەتىن) قويۋ.

ەگەر بۇل كولەمدە قازاقستاندىق ازىق- تۇلىك بولماعان جاعدايدا، قالعان ورىندار مەن سورە كەڭىستىگى ىشكى ساۋدا سۋبەكتىسىنىڭ قالاۋى بويىنشا باسقا تاۋارلارمەن تولتىرىلادى.

سونداي-اق، ازىق-تۇلىككە ارنالعان ساۋدا الاڭىن نەمەسە سورە كەڭىستىگىن ءبولۋ قازاقستاندىق ءوندىرۋشى نەمەسە قازاقستاندىق ءونىمدى وتكىزەتىن ىشكى ساۋدا سۋبەكتىسىنىڭ جازباشا ءوتىنىشى نەگىزىندە جۇزەگە اسىرىلادى.

ەگەر ءوتىنىش بولماسا، ساۋدا جەلىلەرى ارقىلى تاۋار وتكىزەتىن ىشكى ساۋدا سۋبەكتىلەرى قازاقستاندىق وندىرۋشىلەردى ءوز بەتىمەن تارتۋدى ۇيىمداستىرادى.

وندىرۋشىلەر نەمەسە جەتكىزۋشىلەر تاراپىنان ءوتىنىشتىڭ بولماۋى نەمەسە جەتكىلىكسىزدىگى جاعدايىندا بوس تۇرعان ساۋدا الاڭى مەن سورە كەڭىستىگى وزگە تاۋارلاردى ساتۋعا پايدالانىلادى.

- كوتەرمە-ۇلەستىرۋ ورتالىعى - اۋىل شارۋاشىلىعى ونىمدەرىن ىشكى جانە سىرتقى نارىقتا ودان ءارى وتكىزۋ ءۇشىن قابىلداۋ، ساقتاۋ جانە باستاپقى وڭدەۋ (تازالاۋ، كاليبرلەۋ، سۇرىپتاۋ، بۋىپ-ءتۇيۋ جانە باسقا قىزمەت) بويىنشا قىزمەت كورسەتەتىن، جەمىس- كوكونىس جانە وسىمدىك شارۋاشىلىعى ونىمدەرىن ءوندىرۋ ورىندارىنا جاقىن ورنالاساتىن، ازىق- تۇلىكپەن جۇمىس ىستەۋگە ارنالعان، ساتىپ الۋ، دايىنداۋ، ءبولۋ جانە وزگە دە وپەراتسيالاردى جۇزەگە اسىرۋعا ارنالعان جىلجىمايتىن مۇلىك وبەكتىسى، - دەلىنگەن قۇجاتتا.

قازاقستاندا شىعارىلعان جانە شەتەلدىك وندىرىستەگى اۆتوكولىكتەر، موتوتسيكلدەر مەن وزگە دە موتوتەحنيكا، سونداي- اق ولارعا ارنالعان نومىرلىك اگرەگاتتار، ەگەر مەنشىك قۇقىعىن راستايتىن قۇجات جانە ساتۋ ماقساتىندا ەسەپتەن شىعارۋ قۇجاتى بولعان جاعدايدا، كوميسسيالىق ساۋداعا قابىلدانادى.

سونىمەن قاتار، كورمە-جارمەڭكە ساۋداسى اياسىندا ورىنداردى بولۋگە قاتىستى باسىمدىق قازاقستاندىق تاۋار وندىرۋشىلەرگە بەرىلەدى.

ودان بولەك، ىشكى ساۋدا سۋبەكتىلەرى الەۋمەتتىك ماڭىزى بار ازىق-تۇلىك وندىرەتىن قازاقستاندىق تاۋار وندىرۋشىلەرمەن كەلىسىمشارتتار جاساسۋى كوزدەلگەن.

بۇيرىق 2025 -جىلعى 12-تامىزدان باستاپ كۇشىنە ەنەدى.

بۇعان دەيىن ەلىمىزدەگى كولەڭكەلى ەكونوميكامەن كۇرەس جانە زاڭسىز تاۋار اينالىمىنىڭ الدىن الۋ باعىتىنداعى جۇمىس تۋرالى ساۋدا جانە ينتەگراتسيا ۆيتسە-ءمينيسترى اسەت ءنۇسىپوۆ ماسكەۋدە وتكەن حالىقارالىق كونفەرەنسيادا بايانداعان ەدى.

اۆتور

داۋلەت ىزتىلەۋ