گيدروتەحنيك جەرگىلىكتى اكىمدىكتەر جىبەرگەن وبەكتيۆتى 2 كەمشىلىكتى اتادى
استانا. KAZINFORM - گيدروتەحنيك امانبەك رامازانوۆ جەرگىلىكتى اكىمدىكتەردىڭ كوكتەمگى سۋ تاسقىنىنا دايىندىق بارىسىندا جىبەرگەن وبەكتيۆتى 2 كەمشىلىگىن اتادى.
«جەرگىلىكتى اكىمدەردىڭ كوكتەمگى سۋ تاسقىنىنا دايىندىق بارىسىندا جىبەرگەن سۋبەكتيۆتى كەمشىلىكتەرى تۋرالى مالىمەتىم جوق. ماسەلەن، كەيبىر اكىمدەر قار شىعارۋدى ۋاقتىلى ۇيىمداستىرماۋى ىقتيمال. نە بولماسا سۋ تاسقىنىنا قارسى قورعانىس بوگەتتەرىن ۋاقتىلى نىعايتپاعان، وزەندەردەگى مۇز كەپتەلىستەرىن جويۋ شارالارىن قاراستىرماعان شىعار. ونى بىلمەيمىن. سوندىقتان ەشتەڭە ايتا المايمىن. ال وبەكتيۆتى كەمشىلىكتەرگە كەلەتىن بولساق، مەنىڭشە، ولار - ەكەۋ. بۇعان قوسا ەكەۋى دە جۇيەلى كەمشىلىك»، - دەدى سۋ شارۋاشىلىعىنىڭ مامانى.
ونىڭ ايتۋىنشا، ءبىرىنشى كەمشىلىك - كوكتەمگى سۋ تاسقىنىنا كەش دايىندىق. ەكىنشىسى - جاھاندىق كليماتتىڭ وزگەرۋى جانە وعان بەيىمدەلۋ قاجەتتىلىگى تۋرالى كوپ ايتىلعانىمەن ناقتى بەيىمدەلۋ شارالارىن قولدانباۋ.
«ءبىرىنشى كەمشىلىككە توقتالار بولسام، سۋ تاسقىنىنا دايىندىقتىڭ ءبارى قىستىڭ سوڭىندا جۇرگىزىلەدى. بۇل كەزدە سۋ تاسقىنىنان تۋىندايتىن زياندى ازايتۋعا نەمەسە ادامداردى قۇتقارۋدى ۇيىمداستىرۋعا عانا بولادى. ايتا كەتەيىن، بۇل تۇرعىدا توتەنشە جاعدايلار مينيسترلىگىنە نەمەسە جەرگىلىكتى اتقارۋشى ورگاندارعا ەش شاعىمىم جوق. ءبىراق، وكىنىشكە وراي، مۇنداي تاسىلمەن تابيعي اپاتتىڭ الدىن الۋ مۇمكىن ەمەس. ال ەكىنشى كەمشىلىككە كەلەر بولسام، كليماتتىڭ وزگەرۋىنە بايلانىستى قيىندىقتارعا دايىن ەمەسپىز. ءدال وسى جىلدىڭ قىسى ەرەكشە (قىس باسىندا قاردىڭ از جاۋۋى، جاڭبىرمەن ارالاسقان قار جامىلعىسىنىڭ پايدا بولۋى جانە قىستىڭ اياعى مەن كوكتەمنىڭ باسىندا قاتتى جاۋىن- شاشىن) بولعانىن باعالاماۋ سەبەبىنەن وسىنداي ۇلكەن سۋ تاسقىنى ورىن الدى. سونىڭ سولدارىنان حالقىمىز ازاپقا ءتۇسىپ وتىر»، - دەدى امانبەك رامازانوۆ.