گيدروسيكلمەن جۇيتكىگەن 82 جاستاعى اجە: «قۇلاسام سۋعا قۇلارمىن دەپ ايداپ كەتتىم»
استانا. KAZINFORM - الەۋمەتتىك جەلىدە 82 جاستاعى اجەيدىڭ گيدروتسيكلمەن جۇيتكىپ جۇرگەن ۆيدەوسى كەڭ تارالىپ جاتىر. Jibek Joly ارناسىنىڭ «بۇگىن LIVe» باعدارلاماسى 12 بالاسى، 23 نەمەرەسى، 30 شوبەرەسى بار كەيۋانانىڭ وزىمەن ونلاين بايلانىسقا شىعىپ، تىلدەسىپ كوردى.
- مەنى اكەم سوعىستان كەلگەندە جاستايىمنان اتقا مىنگىزىپ ۇيرەتكەن. ۋاقىتىندا ۆەلوسيپەد تە اپەرگەن. جاستىق شاعىمدا سونىڭ ءبارىن كورگەنمىن عوي. ودان كەيىن اللا بۇيىرتىپ، تۇرمىسقا شىقتىم. قۇدايدىڭ بەرگەن 12 بالاسىن ءوسىرىپ، جەتكىزدىم. «باتىر انا» اتاندىم. ولاردى جۇمىسىممەن قاباتتاستىرىپ ءجۇرىپ تاربيەلەدىم. دەپۋتات بولىپ تا سايلاندىم. جاقسى ەڭبەگىمنىڭ ارقاسىندا ماسكەۋگە دە جىبەردى. سولاي ەلدىڭ، حالىقتىڭ كوتەرمەلەۋىمەن ءوزىمدى باقىتتى سانادىم. زەينەتكە شىققاسىن بالالارىمنىڭ ارقاسىندا شەتەلدى دە ارالادىم. ەگيپەتتە «سۋدىڭ استىنا ءتۇسىپ كورەسىز بە؟» دەگەندە، سۋدىڭ استىنا دا ءتۇستىم. سودان كەيىن گيدروتسيكل دەگەن نە تۇرادى، ونى دا كورەيىن دەپ، تاۋەكەل ەتىپ ءمىندىم. ودان العان اسەرىم قاتتى ۇنادى. كولدىڭ ۇستىندە اينالىپ جۇرگەن ەرەكشە ەكەن. قۇلاسام، سۋعا قۇلارمىن، تاۋەكەل دەدىم دە، ايداپ كەتە بەردىم، - دەيدى جادىرا جانيمان.
ال اجەيدىڭ گيدروتسيكلدى جۇيتكىتكەن ۆيدەوسىن جانىندا وتىرعان ينسترۋكتور جىگىت تاسپالاپ، الەۋمەتتىك جەلىدە جاريالاعان ەكەن.
- ارتىمدا ءبىر بالا ۆيدەوعا ءتۇسىرىپ وتىردى. ول مەننەن: «اپا، ايداۋدى قايدان بىلەسىز؟» دەپ سۇرادى. مەن: «ءبارىن بىلەمىن، ءبارىن ايداپ كورگەم»، - دەدىم دە، كەتە بەردىم. ەرتەڭىنە قىزىمنىڭ تەلەفونىنان كوردىم. «اپا، ءسىزدى Instagram-عا شىعارىپ جىبەرىپتى»، - دەدى. مەنىڭ گيدروتسيكل ايداعانىم حالىققا تانىمال بولىپتى. ەندى حالىققا، جاستارعا ۇلگى بولسىن، - دەيدى جەلى جۇلدىزى.