ۇيدەن شىقپاڭىز: ت ج د استانالىقتارعا ەسكەرتۋ جاسادى

استانا. KAZINFORM - بوران مەن جەلدىڭ كۇشەيۋىنە بايلانىستى استانانىڭ توتەنشە جاعدايلار دەپارتامەنتى قالا تۇرعىندارىنا ەسكەرتۋ جاسادى. اتاپ ايتقاندا، قالانىڭ سىرتىنا شىقپاي، ساق بولۋعا، اۋا رايىن قاداعالاپ، شەكتەۋ تۋرالى اقپاراتتى قاداعالاپ وتىرۋعا شاقىرادى.

قازگيدرومەت مالىمەتى بويىنشا، 9-اقپاندا استانا قالاسىندا بوران، كوكتايعاق بولادى. وڭتۇستىك- باتىستان، باتىستان سوققان جەلدىڭ ەكپىنى 23-28 م/س جەتەدى.

8-اقپان كەشكە، تۇندە جانە 9-اقپان تاڭەرتەڭ جەل قارقىنى 30 م/س اسادى.

8-اقپان ساعات 18.00 دەگى جاعداي بويىنشا استانا قالاسىنان شىعاتىن بارلىق جولدار جابىلعان.

«داۋىل كەزىندە ەڭ الدىمەن، ەلەكتر جەلىلەرى مەن جابدىقتاردىڭ، تۇرعىن ۇيدەگى جىلىتۋ پەشىنىڭ جاي-كۇيىن تەكسەرۋ، ىشكى جانە سىرتقى ورتكە قارسى سۋمەن جابدىقتاۋدىڭ، تەلەفون بايلانىسىنىڭ جارامدىلىعىن قامتاماسىز ەتۋ، ورتكە قارسى قۇرالداردى دايىنداۋ قاجەت. پاتەردەگى ەلەكتر جەلىسىنىڭ كەرنەۋى جوعارىلاعان كەزدە بۇكىل تۇرمىستىق تەحنيكانى دەرەۋ روزەتكادان اجىراتىڭىز. ءسىز جوقتا كەنەتتەن ەلەكتر قۋاتى قوسۋلى كەزدە ءورت تۇتانباس ءۇشىن روزەتكانى ءوشىرىڭىز. سونداي-اق، جەكە كولىكتى اعاشتار مەن ەسكى عيماراتتاردان اۋلاققا قويىڭىز. ۇيدەگى بۇكىل تەرەزەلەردى مىقتاپ جاپقان ءجون. ەگەر كوشەدە قاتتى جەل سوقسا، قاۋىپسىز ءۇي-جايدى پانالاڭىز. بالالاردى سىرتقا شىعارماۋعا تىرىسىڭىز جانە مۇمكىندىگىنشە ءوزىڭىز دە شىقپاڭىز. ەگەر مۇنداي قاجەتتىلىك تۋىنداسا، تۋىستارىڭىزعا نەمەسە كورشىلەرىڭىزگە قايدا بارا جاتقانىڭىزدى جانە قاشان ورالعانىڭىزدى ايتىڭىز. جالعىز شىقپاۋعا تىرىسىڭىز» دەپ كەڭەس بەرەدى قۇتقارۋشىلار.

سونداي-اق ەلوردا تۇرعىندارى جولدا اباي بولىپ، قاۋىپسىزدىك ەرەجەلەرىن ساقتاۋى، الىس ساپارلاردان باس تارتقانى دۇرىس.

توتەنشە جاعداي تۋىنداعان كەزدە «112» تەلەفونىنا حابارلاسىڭىز.

ايتا كەتەيىك، بۇگىن استانادا 0-11-سىنىپ وقۋشىلارى مەكتەپكە بارمايدى. ساباقتى قاشىقتان وقيدى.