پەيدجەرلەر جارىلىسى: «حەزبوللا» يزرايلدى ايىپتاپ وتىر
استانا. قازاقپارات – 17-قىركۇيەكتە «حەزبوللا» مۇشەلەرى پايدالاناتىن پەيدجەرلەر بۇكىل ليۆاندا ءبىر ۋاقىتتا جارىلدى. كەم دەگەندە توعىز ادام قازا تاۋىپ، ءۇش مىڭعا جۋىق ادام جاراقات الدى. بۇل وقيعادا «حەزبوللا» يزرايلدى ايىپتادى، دەپ جازادى Reuters.
ليۆانداعى «حەزبوللا» قارۋلى توبىنىڭ مۇشەلەرى اراسىندا ءبىر ۋاقىتتا پەيدجەرلەردىڭ (داۋىس حابارلامالارىن قابىلدايتىن سىمسىز تەلەكوممۋنيكاتسيالىق قۇرىلعىلار) جارىلۋى سالدارىنان كەمىندە توعىز ادام قازا تاۋىپ، 3000-عا جۋىق ادام جاراقات الدى.
Reuters اگەنتتىگىنىڭ حابارلاۋىنشا، العاشقى جارىلىستار 17-قىركۇيەك كۇنى جەرگىلىكتى ۋاقىت بويىنشا ساعات 15:30 شاماسىندا بولىپ، ليۆاننىڭ ءارتۇرلى ايماقتارىندا، سونىڭ ىشىندە ەلدىڭ وڭتۇستىگى مەن ەل استاناسى بەيرۋتتە ءبىر ساعاتقا سوزىلعان.
اگەنتتىك قاۋىپسىزدىك كوزدەرىنە جانە وقيعا ورنىنان تۇسىرىلگەن بەينەماتەريالداردى تالداۋعا سىلتەمە جاساي وتىرىپ، كەيبىر پەيدجەرلەردىڭ دىبىستىق سيگنالدان كەيىن جارىلعانىن، سوندىقتان قۇرىلعىلاردىڭ يەلەرى ەكراندى تەكسەرۋ ءۇشىن ولاردى ۇستاپ تۇرعانىن نەمەسە «نە سيگنال ەكەنىن ءتۇسىنۋ ءۇشىن» پەيدجەرلەرگە جاقىننان ۇڭىلە قاراپ تۇرعانىن اتاپ ءوتتى.
Reuters تالداۋىنا سايكەس، جارىلىستار ءالسىز بولعانىمەن، قۇرىلعىنىڭ يەسى نەمەسە وعان جاقىن تۇرعان ادامدار زارداپ شەككەن.
ليۆان قاۋىپسىزدىك كۇشتەرىندەگى جوعارى لاۋازىمدى تۇلعالارىنىڭ ايتۋىنشا، يزرايلدىڭ «موسساد» بارلاۋ اگەنتتىگى جارىلىستاردان بىرنەشە اي بۇرىن حەزبوللا تاپسىرىس بەرگەن 5000 پەيدجەرگە جارىلعىش زات قويعان.
اگەنتتىك سۇحباتتاستارىنىڭ ءبىرى بۇل توپ تايۆاننىڭ Gold Apollo كومپانياسىنا پەيدجەرلەرگە تاپسىرىس بەرگەنىن جانە قۇرىلعىلاردىڭ ليۆانعا وسى جىلدىڭ باسىندا اكەلىنگەنىن ايتتى. كومپانيا قۇرىلعىلاردى وندىرمەگەنىن مالىمدەگەن جانە ولاردى تايۆان ءوندىرۋشىسىنىڭ برەندىن پايدالانۋعا قۇقىعى بار ەۋروپالىق فيرما جاساعانىن ايتتى.
ايتۋلارىنشا، «حەزبوللا» مۇشەلەرى ۇيالى تەلەفونداردى تاستاپ، يزرايل ولاردىڭ ورنالاسقان جەرىن باقىلاي المايتىنداي ەتىپ پەيدجەرلەرگە كوشكەن. جارىلعان قۇرىلعىلار سوڭعى ايلاردا اكەلىنگەن پەيدجەردىڭ سوڭعى ۇلگىلەرى بولدى، دەيدى اگەنتتىك دەرەككوزدەرى.
حەزبوللا رەسمي تۇردە بۇل وقيعا ءۇشىن ءيزرايلدى ايىپتاپ، «ءادىل جاۋاپ بەرۋگە» ۋادە بەردى. يزرايل پەيدجەرلەردىڭ جارىلۋى تۋرالى اقپاراتقا ءالى تۇسىنىكتەمە بەرگەن جوق.
ايتا كەتەيىك، بۇعان دەيىن ليۆانداعى پەيدجەرلەر جارىلىسىنان جۇزدەگەن «حەزبوللا» مۇشەسى جاراقات العانى تۋرالى جازعان ەدىك. سەيسەنبى كۇنگى پەيدجەرلەر جارىلىسىنان زارداپ شەككەندەردىڭ اراسىندا يراننىڭ ليۆانداعى ەلشىسى مودجتابا اماني دە بار، دەپ حابارلايدى يراننىڭ Mehr اقپارات اگەنتتىگى.
بەيرۋتتان حابار تاراتۋشى ءال- جازيرا ءتىلشىسى زەينا حودردىڭ ايتۋىنشا، قۇرىلعىلار كەلىسىلگەن شابۋىل كەزىندە بۇزىلىپ، جارىلعان. بۇل يزرايل مەن يران قولداۋ بىلدىرەتىن ليۆاندىق توپ اراسىنداعى سوعىستاعى «ەلەۋلى وقيعا» بولدى.
«بۇل قاۋىپسىزدىكتى ورەسكەل بۇزۋ. «حەزبوللانىڭ» بايلانىس قۇرىلعىسى بۇزىلدى. ءبىز ليۆاننىڭ تۇكپىر- تۇكپىرىندە ەر ادامداردىڭ ەدەندە جارالانىپ جانە قانسىراپ جاتقانىن كوردىك. ءبىز اۋرۋحانالاردىڭ قان سۇراپ جاتقانى تۋرالى حابارلاردى كوردىك»، - دەدى ول.
تاۋەلسىز اسكەري جانە ساياسي ساراپشى ەلايدجا مانە «حەزبوللا» يزرايلدىڭ بايلانىستارىنا كەدەرگى جاساۋ ءۇشىن پەيدجەرلەردى بەلسەندى تۇردە قولداناتىنىن ايتىپ، ولاردى «حەزبوللا» مۇشەلەرىنە تاراتپاي تۇرىپ بۇزعان بولۋى كەرەك دەپ بولجايدى.
اۆتور
جاراسقان نۇرىبايەۆ