ۇيدە وتىرعان ازاماتتار جۇمىسسىز سانالا ما - تامارا دۇيسەنوۆا جاۋاپ بەردى

استانا. KAZINFORM – ق ر پرەمەر-ءمينيسترىنىڭ ورىنباسارى تامارا دۇيسەنوۆا جۇمىسسىزدار قاتارىنا كىمدەر جاتاتىنىن ءتۇسىندىرىپ بەردى.

«جۇمىسسىزدىق تۋرالى ايتار بولساق، ەلىمىزدە حالىقارالىق ستاندارت رەتىندە قابىلدانعان ادىستەمە بار. سول ادىستەمەگە سايكەس، ادام الدىمەن جۇمىس ىزدەۋ كەرەك، ناتيجە بولماسا جۇمىسپەن قامتۋ ورتالىعىنا جۇگىنۋ قاجەت، ەڭ باستىسى ادامنىڭ جۇمىس ىستەۋگە نيەتى بولۋى ءتيىس. ەگەر ادام ەڭبەكپەن قامتۋ ورتالىعىنا جۇگىنبەي، ۇيدە وتىرسا ول جۇمىسسىز دەپ سانالمايدى»، - دەدى تامارا دۇيسەنوۆا ءماجىلىستىڭ جالپى وتىرىسى بارىسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.

ەسكە سالساق، تاياۋدا ءماجىلىس دەپۋتاتى اسحات ايماعامبەتوۆ ەڭبەك نارىعىنداعى تەڭسىزدىك پەن ماماندار تاپشىلىعى ماسەلەسىن كوتەرىپ، جۇمىسپەن قامتۋدا «تىزەسى شىققان» شارالاردى قولدانىپ جاتقانىن ايتقان ەدى.

حالىق قالاۋلىسىنىڭ سوزىنشە، ۇكىمەت ەسەبىندە جىل سايىن شامامەن 900 مىڭ ادام جۇمىسقا ورنالاساتىنىن، جىلىنا ميلليونعا جۋىق ادام جۇمىسقا ورنالاسسا دا، جۇمىسسىزدىق دەڭگەيى وزگەرىسسىز قالىپ وتىر.

ايتا كەتەيىك، بۇگىن ءماجىلىستىڭ جالپى وتىرىسىندا «2025-2027-جىلدارعا ارنالعان رەسپۋبليكالىق بيۋجەت تۋرالى» زاڭ قابىلداندى. جاڭا زاڭعا سايكەس بيۋجەتتىڭ نەگىزگى ۇلەسى الەۋمەتتىك سالاعا باعىتتالادى.