ياسمينا توقسانبايەۆانىڭ التىن مەدالىنەن سوڭ جاۋاپتى تۇلعالار جازالانۋى مۇمكىن

استانا. KAZINFORM - تۋريزم جانە سپورت ءمينيسترى ەربول مىرزابوسىنوۆ جاپونيادا وتكەن 2026 -جىلعى ازيا ويىندارىندا التىن مەدالىنەن ايىرىلعان جەڭىل اتلەت ياسمينا توقسانبايەۆاعا قاتىستى جاعدايعا پىكىر ءبىلدىردى.

Фото: Ақорда

ونىڭ ايتۋىنشا، قازاقستان جەڭىل اتلەتيكا فەدەراتسياسى داۋلى ماسەلە بويىنشا اربيتراجعا قۇجاتتار جولداعان. سوت پروتسەسى اياقتالعاننان كەيىن وقيعاعا قاتىسى بار جاۋاپتى تۇلعالاردىڭ ماسەلەسى قارالادى.

مينيستر بۇل جاعدايعا ءبىر عانا ادامنىڭ ەمەس، بىرنەشە تاراپتىڭ جاۋاپكەرشىلىگى بار ەكەنىن اتاپ ءوتتى. ونىڭ قاتارىندا سپورت كوميتەتى، جەڭىل اتلەتيكا فەدەراتسياسى، ۇلتتىق وليمپيادا كوميتەتى، جاتتىقتىرۋشىلار شتابى جانە سپورتشىنىڭ ءوزى بار.

«قازىر فەدەراتسيا ياسمينانىڭ ءىسى بويىنشا بەلسەندى جۇمىس ىستەپ جاتىر جانە اربيتراجدىق سوتقا وتىنىشتەرىن جولدادى. ەڭ باستىسى - مۇنداي جاعدايلاردىڭ قايتالانۋىنا جول بەرمەۋ. بۇل جەردە سپورت كوميتەتىنىڭ، فەدەراتسيانىڭ، ۇلتتىق وليمپيادا كوميتەتىنىڭ، جاتتىقتىرۋشىلار شتابىنىڭ جانە سپورتشىنىڭ ءوزىنىڭ دە جاۋاپكەرشىلىگى بار.

جەڭىل اتلەتيكادا 45 ديستسيپلينا بار. بۇل جولى بولماۋى ءتيىس جاعداي ورىن الدى. ءبىز ارنايى جول كارتاسىن ازىرلەپ، مۇنداي وقيعالاردىڭ قايتالانباۋى ءۇشىن جۇمىس ىستەپ جاتىرمىز. سوت تۇپكىلىكتى شەشىم شىعارعاننان كەيىن بولعان جاعدايعا جاۋاپتى ادامداردىڭ ماسەلەسىن مىندەتتى تۇردە قاراستىرامىز. دەگەنمەن ءبىزدىڭ باستى ۇستانىمىمىز - سپورتشىنى قولداۋ. سپورتتىق مانساپ ءبىر جارىسپەن اياقتالمايدى. الدا وليمپيادا ويىندارى بار»، - دەدى ەربول مىرزابوسىنوۆ ورتالىق كوممۋنيكاتسيالار قىزمەتىندە وتكەن بريفينگتە.

ەسكە سالايىق، 27-قىركۇيەكتە جاپونيادا وتكەن ازيا ويىندارىندا ياسمينا توقسانبايەۆا 42,195 شاقىرىمدىق مارافوندىق سپورتتىق جۇرىستە مارە سىزىعىن ءبىرىنشى بولىپ كەسكەن ەدى. ول قاشىقتىقتى 3 ساعات 22 مينۋت 20 سەكۋندتا ءجۇرىپ ءوتتى.

الايدا كەيىن قازاقستاندىق سپورتشى جارىستان شەتتەتىلدى. بۇعان ونىڭ كيگەن اياق كيىم ۇلگىسىنىڭ World Athletics ۇيىمى ماقۇلداعان تىزىمدە بولماۋى سەبەپ بولعان. ناتيجەسىندە التىن مەدال قىتاي وكىلى داڭزىڭ چيۋيزۇڭعا بەرىلدى.