ياساۋي مۋزەيىنە جۇمسالعان شىعىنداردىڭ نەگىزدىلىگى تەكسەرىلەدى
تۇركىستان وبلىسىنىڭ اكىمى دارحان ساتىبالدى ورتالىق كوممۋنيكاتسيالار قىزمەتىندە وتكەن بريفينگىدە قوجا احمەت ياساۋي مۋزەيىنە جۇمسالعان شىعىنداردىڭ نەگىزدىلىگى تەكسەرىلەتىنىن ايتتى، دەپ حابارلايدى Kazinform.
بريفينگ كەزىندە جۋرناليستەر «سامۇرىق- قازىنا» قورىنىڭ قارجىلاندىرۋى ارقىلى سالىنعان قوجا احمەت ياسساۋي كەسەنەسىنىڭ نەگە ءالى قولدانىسقا بەرىلمەي كەلە جاتقانىن سۇرادى.
اكىمنىڭ ايتۋىنشا، نىسان 2020 -جىلى قولدانىسقا بەرىلىپ، تۇركىستان قالاسىنىڭ اكىمدىگىنە قايتارىمسىز نەگىزدە تابىستالعان. ءبىراق ول كەزدە نىساننىڭ ءىشىن ارلەۋ جۇمىستارى جاسالماعان كورىنەدى. وسىعان بايلانىستى قالا اكىمدىگى مۋزەيدىڭ ءىشىن تولىقتىرۋ جۇمىستارىن جوسپارلاعان. قازىر نىسان ءالى جابىق تۇر.
«ول نىسانعا ءوزىم دە باس سۇقتىم. وسى ماسەلەنىڭ انىق- قانىعىنا جەتكىم كەلەدى. قازىر تەكسەرۋ جۇمىستارى ءجۇرىپ جاتىر. قازىر شىعىنداردىڭ نەگىزدىلىگى تۋرالى ماسەلەنىڭ بايىبىنا بارعىم كەلەدى. شەشىمدى سودان كەيىن قابىلدايمىز. باسقا نىساندارمەن بايلانىستى دا ءدال وسى سياقتى ماسەلەلەر بار: وزەن جاعاسىن بەكەمدەۋ بويىنشا دا، ەلەكتروكار بويىنشا دا، ساپار- ورتالىق بويىنشا دا، مونشا كەشەنى بويىنشا دا، نەكە ءۇيى بويىنشا دا»، - دەدى وبلىس اكىمى.
سونداي- اق، ول ءىستىڭ ماتەريالدارى قۇقىق قورعاۋ، ورگاندارىنا بەرىلگەنىن ايتتى. ال ول ورگاندار ىشكى اۋديت قىزمەتىن ىسكە تارتىپ، نىساندارعا جۇمسالعان شىعىننىڭ نەگىزدىلىگىن تەكسەرەدى.
بۇعان دەيىن تۇركىستانعا تۋريست تارتۋ ءۇشىن سالىنعان ساراپ ورتالىعىنىڭ جەكە كومپانيانىڭ سەنىمگەرلىك باسقارۋىنا وتكەنى ءمالىم بولعان.
«مەنىڭ ويىمشا، ول كەزدە نىساندى كۇتىپ ۇستاۋ شىعىندارىنا بيۋدجەتتەن اقشا شىعىنداعىلارى كەلمەگەن شىعار. ول جەتكىلىكتى دەڭگەيدە قىزمەت ىستەپ تۇرماعانىن كورگەننەن كەيىن الگى جەكە كومپانيامەن جاسالعان كەلىسىمدى بۇزۋ تۋرالى شەشىم قابىلداندى. ءبىز ءتىپتى سوتقا بارىپ تۇرىپ، ىمىرالى كەلىسىم جاساستىق تا، نىساندى وزىمىزگە الدىق. ورتالىق قازىر جەرگىلىكتى بيلىكتىڭ بالانسىندا»، - دەدى دارحان ساتىبالدى.