ياندەكس مەملەكەتتىك جۇمىسپەن قامتۋ باعدارلامالارىنان تيىمدىرەك بولىپ شىقتى - دەپۋتات

استانا. KAZINFORM - ءماجىلىس دەپۋتاتى ەلنۇر بەيسەنبايەۆ مەملەكەتتىك جۇمىسپەن قامتۋ باعدارلامالارىن سىنعا الدى.

دەپۋتات ءوز سوزىندە مەملەكەت باسشىسى 2029-جىلعا قاراي 3,3 ميلليون جاڭا جۇمىس ورنىن اشۋ جونىندە ناقتى تاپسىرما بەرگەنىن ەسكە سالدى.

«اشىلعان جاڭا جۇمىس ورىندارىنىڭ 80 پايىزعا جۋىعى ۋاقىتشا. ۇكىمەتكە ءبىر پلاتفورمانىڭ جۇمىسى جايىندا ناقتى مىسالىن كەلتىرگىم كەلەدى. ياعني، جۇمىسپەن قامتۋدىڭ بارلىق مەملەكەتتىك باعدارلامالارىنا قاراعاندا ياندەكس جۇيەسى جۇمىسقا ورنالاستىرۋدا الدەقايدا ءتيىمدى بولىپ شىقتى. بەيرەسمي دەرەكتەر بويىنشا بۇل جۇيەدە 700 مىڭنان استام قازاقستاندىق جۇمىس ىستەيدى. ولار 2023-جىلدىڭ قورىتىندىسىندا شامامەن 1 تريلليون تەڭگە، ال ياندەكستىڭ ءوزى 400 ميلليارد تەڭگەگە جۋىق تابىس تاپقان»، - دەدى ە. بەيسەنبايەۆ پارلامەنت پالاتالارىنىڭ بىرلەسكەن وتىرىسىندا.

ونىڭ سوزىنە قاراعاندا، بۇل جۇيەنى 12 ميلليوننان استام ەل تۇرعىنى پايدالانىپ وتىر.

«ءبىر عانا وسى مىسالدىڭ ءوزى ۇكىمەتتىڭ حالىقتى جۇمىسپەن قامتاماسىز ەتۋدەگى قادامدارىنىڭ ءمانى مەن السىزدىگىن كورسەتىپ تۇر»، - دەدى دەپۋتات.