كونسەرتتەر قارساڭىندا ونەر يەسى جانكۇيەرلەرىمەن كەزدەسىپ، مەكسيكا جانە حالىقارالىق باق وكىلدەرىنە باسپا ءسوز ءماسليحاتىن وتكىزدى، دەپ حابارلايدى Dimashnews.com.
18-قاراشادا ءانشىنى قولدارىنا قازاقستان مەن مەكسيكانىڭ تۋىن ۇستاعان كوپتەگەن جانكۇيەر قارسى الدى. جينالعاندار ونەر يەسىن دۋ قول شاپالاقتاپ، وزدەرىنە بۇرىننان تانىس «،Dimash, hermano! ،Ya eres mexicano!» («ديماش، باۋىرىم! سەن ەندى مەكسيكالىقسىڭ!») دەگەن ۇرانمەن قارسى الدى.
ديماش مىنگەن كولىكتى جانكۇيەرلەر قورشاپ العان كەزدە ءانشى ليۋكتى اشىپ، كولىكتىڭ توبەسىنە كوتەرىلىپ، جينالعان قاۋىممەن ءوزى امانداستى.
مەحيكو DIMENSIONS الەمدىك تۋرىنىڭ مەكسيكاداعى ءتورتىنشى قالاسى بولدى. بۇعان دەيىن كونتسەرتتەر مەريدا، مونتەررەي جانە گۆادالاحارا قالالارىندا وتكەن ەدى.
باسپاءسوز ءماسليحاتىندا ديماش مەكسيكاعا ەلدەگى العاشقى جەكە كونسەرتىنەن ءبىر جىل وتكەن سوڭ قايتا ورالۋى ءوزى ءۇشىن ەرەكشە وقيعا ەكەنىن ايتتى.
- سوڭعى ون جىلدا الەمنىڭ كوپتەگەن ەلىندە جەكە كونسەرتتەرىمىزدى وتكىزدىك. ءبىراق بىلتىر مەكسيكاداعى كونتسەرتتەن كەيىن كونسەرت ديرەكتورلارىما: «ءبىز بۇل جەرگە مىندەتتى تۇردە قايتا ورالۋىمىز كەرەك! ەگەر مۇمكىندىك بولسا، كەلەسى كونتسەرتتى تەزىرەك ۇيىمداستىرايىق»، - دەدىم. مىنە، ءبىز قايتادان وسىندامىز! - دەدى ءانشى.
كەزدەسۋدەگى باستى جاڭالىقتاردىڭ ءبىرى -ونەر يەسىنىڭ يسپان تىلىندە مۋزىكالىق شىعارما جازۋ نيەتى تۋرالى مالىمدەمەسى بولدى.
- جاقىن ارادا يسپان تىلىندە سويلەيتىن بارلىق جانكۇيەرىم ءۇشىن، ارينە، مەكسيكالىق تىڭدارماندار ءۇشىن دە ءبىر دۇنيە جاساپ كورگىم كەلەدى. ويتكەنى ولار بۇعان لايىق دەپ ويلايمىن. ماعان سوزدەردى دۇرىس ايتۋعا كومەكتەسەتىن ادام تاپقىم كەلەدى. بۇل تۋىندىنى جاقىن ارادا جارىققا شىعارامىز دەپ ۇمىتتەنەمىن،-دەدى ديماش.
ءانشى ءوزىنىڭ مۋزىكالىق تالعامى تۋرالى دا اڭگىمەلەدى. ول يسپان تىلىندەگى سۇيىكتى شىعارمالارىنىڭ قاتارىندا «Historia de un Amor» «Bésame Mucho» جانە ارگەنتينالىق ورىنداۋشى لۋچانو پەرەيرانىڭ «Porque aْn te amo» ءانىن اتادى.
كەزدەسۋ بارىسىندا ونەر يەسى حالىقارالىق مانسابىنىڭ باستالۋىن جانە قىتايدىڭ Singer تەليەۆيزيالىق بايقاۋىنا قاتىسقان كەزەڭىن ەسكە الدى. ونىڭ جادىندا شەتەلدىك مىڭداعان كورەرمەن الدىندا قازاقتىڭ حالىق ءانى «دايديداۋدى» ورىنداعان ءسات ەرەكشە ساقتالعان.
- مەن ساحنادا 20-30 مىڭ ادامنىڭ الدىندا تۇردىم. كەنەت ولاردىڭ ءبارى مەنىمەن بىرگە ءوز انا تىلىمدە ءان ايتا باستادى. ونىڭ ۇستىنە، سوزدەردى انىق، اكسەنتسىز دەرلىك ايتتى! مەن قاتتى تاڭعالدىم. ارادا ون جىلعا جۋىق ۋاقىت وتكەندە، تۋرا كەشە گۆادالاحاراداعى كونتسەرتتە ءدال سونداي سەزىمدى قايتا باستان وتكەردىم،- دەدى ول.
ديماشتىڭ ايتۋىنشا، ونىڭ مۋزىكاسىنىڭ اۋقىمدى جارنامالىق ناۋقاندارسىز حالىقارالىق دەڭگەيدە تانىلۋىنا جانكۇيەرلەرىنىڭ قولداۋى مۇمكىندىك بەرگەن.
جۋرناليستەردىڭ سۇراقتارىنا جاۋاپ بەرە وتىرىپ، ءانشى DIMENSIONS الەمدىك تۋرىنىڭ تۇجىرىمداماسىن دا ءتۇسىندىردى. ونىڭ ايتۋىنشا، تۋردىڭ اتاۋى ادام بولمىسىنىڭ سان قىرىن جانە كلاسسيكا، پوپ، روك، دجاز بەن ءرەپتى بىرىكتىرەتىن شىعارماشىلىعىنىڭ مۋزىكالىق ارتۇرلىلىگىن بىلدىرەدى.
باسپاءسوز ءماسليحاتىندا وتباسىلىق قۇندىلىقتارعا دا ەرەكشە نازار اۋدارىلدى. ديماش اتا-اناسىنىڭ قولداۋى ونىڭ ءومىرى مەن شىعارماشىلىق جولىندا ماڭىزدى ءرول اتقاراتىنىن اتاپ ءوتتى.
- بالا كەزىمدە مۋزىكا ومىردەگى ەڭ ماڭىزدى نارسە دەپ ويلايتىنمىن. مۋزىكانى ءالى دە قاتتى جاقسى كورەمىن. الايدا ەسەيە كەلە وتباسى، ادامدارمەن جاقسى قارىم- قاتىناس جانە جاقسى ادام بولۋعا ۇمتىلۋ الدەقايدا ماڭىزدى ەكەنىن تۇسىنە باستادىم. مۋزىكا ودان كەيىنگى ورىندا، - دەدى ونەر يەسى.
شىعارماشىلىعى تۋرالى ايتقان ءانشى ساحناداعى ونەر كورسەتۋ ول ءۇشىن ۆوكالدىق شەبەرلىگىن تانىتۋدىڭ عانا ەمەس، ادامدارعا بەيبىتشىلىك پەن ماحاببات تۋرالى ەسكە سالۋدىڭ دا ءتاسىلى ەكەنىن جەتكىزدى.
— «The Story of One Sky» ءانىن ورىنداعاندا، ادامدارعا سوعىسسىز الەم تۋرالى ەسكە سالۋعا تىرىسامىن. ال «ماحاببات بەر ماعان» ءانىن ايتقاندا، ماحاببات تۋرالى وي سالعىم كەلەدى. مەن قولىمنان كەلگەننىڭ ءبارىن جاساۋعا تىرىسامىن، - دەدى ديماش.
سونداي-اق ونەر يەسى جاس مۋزىكانتتارعا كەڭەس بەرىپ، تۇراقتى جاتتىعۋدىڭ، ساپالى ءبىلىم الۋدىڭ جانە شىعارماشىلىققا شىنايى قاراۋدىڭ ماڭىزىن اتاپ ءوتتى.
- تەحنيكا وتە ماڭىزدى. ءبىراق ونەر تۋرالى ايتاتىن بولساق، ەڭ باستىسى -شىن جۇرەكتەن ءان ايتۋ. ەگەر ساحنادا نە ىستەپ جاتقانىڭا ءوزىڭ سەنبەسەڭ، ورىنداپ تۇرعان ءانىڭنىڭ سوزىنە سەنبەسەڭ، وندا ءان ايتپاعانىڭ دۇرىس، - دەپ اتاپ ءوتتى ول.
كەزدەسۋ سوڭىندا ديماش مەكسيكالىق جانكۇيەرلەرىنە جىلى قابىلداۋى مەن كوپجىلدىق قولداۋى ءۇشىن العىس ايتتى.
- سىزدەرسىز، سىزدەردىڭ قولداۋلارىڭىز بەن ماحابباتتارىڭىزسىز مەن ونەر يەسى رەتىندە قالىپتاسا الماس ەدىم. مۇنى جاقسى تۇسىنەمىن. بارلىعىڭىزعا راقمەت. وسى جەتىستىككە جەتۋىمە سىزدەر مۇمكىندىك بەردىڭىزدەر. Te amo! - دەپ جينالعاندارعا ءۇن قاتتى ءانشى.
19-جانە 20-قاراشادا ديماش قۇدايبەرگەن مەكسيكا استاناسىندا DIMENSIONS كونتسەرتتىك شوۋىن ۇسىنىپ، الەمدىك تۋردىڭ مەكسيكا كەزەڭىن اياقتايدى.
بۇعان دەيىن ديماش قۇدايبەرگەننىڭ مەكسيكانىڭ گۆادالاحارا قالاسىندا العاش رەت جەكە كونتسەرتىن وتكىزگەنى حابارلانعان ەدى. DIMENSIONS شوۋى 17-قاراشادا Auditorio Telmex كونسەرت زالىندا ءوتىپ، كورەرمەن زالى لىق تولدى.