يادرولىق سوعىس سالدارىن زەرتتەيتىن تاۋەلسىز عىلىمي ساراپشىلار توبى قۇرىلدى
استانا. KAZINFORM – ب ۇ ۇ باس حاتشىسى انتونيۋ گۋتەرريش يادرولىق سوعىستىڭ جەرگىلىكتى، وڭىرلىك جانە جاھاندىق دەڭگەيدەگى فيزيكالىق جانە الەۋمەتتىك سالدارىن زەرتتەيتىن تاۋەلسىز عىلىمي ساراپشىلار توبىن قۇرۋ تۋرالى مالىمدەدى.
بۇل 21 ساراپشىدان تۇراتىن توپ قوعامدىق دەنساۋلىق ساقتاۋ، ەكوجۇيەلەر، اۋىل شارۋاشىلىعى جانە جاھاندىق الەۋمەتتىك-ەكونوميكالىق جۇيەلەرگە يادرولىق سوعىستىڭ ىقتيمال اسەرىن جان-جاقتى زەرتتەمەك. ايتا كەتەيىك، بۇۇ وسىنداي سالالار اراسىنداعى كەشەندى زەرتتەۋدى سوڭعى رەت 1988-جىلى جۇرگىزگەن بولاتىن.
توپتىڭ قۇرىلۋى بۇۇ باس اسسامبلەياسىنىڭ قارارىنا نەگىزدەلگەن. ساراپشىلاردى تاعايىنداۋ - قازىرگى جاھاندىق احۋالعا جاۋاپ. بۇۇ مالىمەتىنشە، يادرولىق سوعىس قاۋپى قىرعي قاباق سوعىستان بەرگى كەزەڭدە بولماعان دەڭگەيگە جەتكەن. يادرولىق قارۋ قىسىم كورسەتۋ قۇرالىنا اينالعان، ارسەنالدار كۇننەن كۇنگە جاڭارتىلىپ جاتىر. يادرولىق قارۋلانۋدىڭ جاڭا جارىسى شىندىققا اينالىپ، تەجەۋ جۇيەلەرى السىرەگەن.
توپ قۇرامىنا ءارتۇرلى عىلىمي سالالاردى قامتيتىن جەتەكشى ساراپشىلار ەنگەن. ولار اقپارات جيناۋدا حالىقارالىق جانە وڭىرلىك ۇيىمداردان، ازاماتتىق قوعامنان جانە زارداپ شەككەن قاۋىمداستىقتاردان دەرەكتەر الۋعا ۇمتىلادى. توپتا الەمنىڭ بارلىق ايماعىنان وكىلدەر بار.
ساراپشىلار العاشقى كەزدەسۋىن قىركۇيەك ايىندا وتكىزىپ، 2027-جىلى ب ۇ ۇ باس اسسامبلەياسىنا قورىتىندى بايانداما ۇسىناتىن بولادى.
بۇعان دەيىن تۇرىكمەنستان يادرولىق قارۋعا تىيىم سالۋ تۋرالى كەلىسىمگە قوسىلۋدى قاراستىراتىنىن حابارلاعان ەدىك.