جاس نەيروحيرۋرگ يسلامبەك مۇسابەكوۆ مەڭگەرگەن بۇل ءادىس كەيىنگى وپەراتسيا كەزىندەگى قان جوعالتۋدى ازايتىپ، ناۋقاستىڭ ساۋىعۋ مۇمكىندىگىن ارتتىرادى.
ق ر پرەزيدەنتى ءىس باسقارماسى مەديتسينالىق ورتالىعىنىڭ اۋرۋحاناسىندا مي اۋرۋلارىن ەمدەۋدىڭ جوعارى تەحنولوگيالىق ادىستەرى كلينيكالىق تاجىريبەگە ەنگىزىلىپ، دامىتىلىپ كەلەدى. وسى باعىتتا ەڭبەك ەتىپ جۇرگەن جاس مامانداردىڭ ءبىرى - نەيروحيرۋرگ يسلامبەك مۇسابەكوۆ. ول مي ىسىگى بار ناۋقاستارعا كورسەتىلەتىن مەديتسينالىق كومەكتىڭ مۇمكىندىكتەرىن كەڭەيتۋگە وراسان ۇلەس قوسىپ ءجۇر.
جاس دارىگەر مەڭگەرگەن ادىستەردىڭ ءبىرى - ەمبوليزاتسيا. بۇل - ىسىكتى قانمەن قامتاماسىز ەتەتىن تامىرلارداعى قان اعىمىن ارنايى ماتەريالداردىڭ كومەگىمەن توقتاتۋ ءتاسىلى. ول ءۇشىن پاتسيەنتتىڭ سان تۇسىنان كىشكەنتاي تىلىك جاسالىپ، جىڭىشكە كاتەتەر ەنگىزىلەدى. كاتەتەر قان تامىرلارى بويىمەن ىسىكتى قورەكتەندىرەتىن تامىرلارعا دەيىن جەتكىزىلىپ، ولاردىڭ ساڭىلاۋى ارنايى مەديتسينالىق ماتەريالمەن بىتەلەدى.
- ەمبوليزاتسيا ىسىكتىڭ قانمەن قامتىلۋىن ازايتىپ، كەيىن ونى حيرۋرگيالىق جولمەن الىپ تاستاۋ كەزىندە بولاتىن قان جوعالتۋ كولەمىن تومەندەتۋگە مۇمكىندىك بەرەدى. بۇل ەمدەۋ كەزەڭىندە باس سۇيەگىن اشىپ وپەراتسيا جاساۋ قاجەت ەمەس. كەيىن ناۋقاستىڭ جاعدايى تۇراقتى بولىپ، اسقىنۋلار بايقالماسا، ول ءتورت-بەس تاۋلىكتە اۋرۋحانادان شىعارىلادى، - دەيدى مامان.
اتالعان مەديتسينالىق كومەك مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسى اياسىندا كورسەتىلەدى.
يسلامبەك مۇسابەكوۆ كلينيكالىق تاجىريبەمەن قاتار عىلىمي- زەرتتەۋ جۇمىستارىمەن دە اينالىسادى. 2026-جىلى حالىقارالىق عىلىمي جۋرنالداردىڭ ءبىرىنشى كۆارتيلىنە (Q1) جاتاتىن باسىلىمداردا ءتورت عىلىمي ماقالا جارىق كوردى. سونىڭ ۇشەۋى مي قابىقتارىنان داميتىن ىسىك ءتۇرى - مەنينگيومالاردى زەرتتەۋگە ارنالعان.
جاس نەيروحيرۋرگ شەتەلدىك ارىپتەستەرىمەن كاسىبي بايلانىس ورناتىپ، تاجىريبە الماسىپ، نەيروحيرۋرگياداعى ەمدەۋ تاسىلدەرىنىڭ جاڭا مۇمكىندىكتەرىن زەردەلەپ كەلەدى. دارىگەردىڭ ايتۋىنشا، جاسالعان ەم-شارالاردان كەيىن ناۋقاستاردىڭ باسىم بولىگى كۇندەلىكتى تىرشىلىگى مەن ەڭبەك قىزمەتىنە ورالىپ، ءومىر ساپاسىن ساقتاي الادى.
م و ا- دا نەيروحيرۋرگيانىڭ وزىق باعىتتارىن دامىتۋ - عىلىمي جەتىستىكتەردى كلينيكالىق تاجىريبەگە ەنگىزىپ، مي ىسىگى بار ناۋقاستارعا كورسەتىلەتىن مەديتسينالىق كومەكتىڭ اۋقىمى مەن ساپاسىن ارتتىرۋعا باعىتتالعان جۇيەلى جۇمىستىڭ ءبىر بولىگى.
وسىعان دەيىن ءپىب اۋرۋحاناسىندا كۇردەلى وپەراتسيالار ۇلكەن تىلىكسىز جاسالاتىنىن جازعانبىز.