قارىز بەرۋدىڭ الدىندا بانكتەر مەن ميكروقارجى ۇيىمدارى ازامات الاياقتاردىڭ اسەرىنەن قارىز الىپ، سودان كەيىن الىنعان اقشانى ءۇشىنشى تۇلعالارعا اۋداراتىن الاياقتىق قارىزدىڭ رەسىمدەلۋىنە جول بەرمەۋ ءۇشىن كليەنتتەرگە ساۋالناما جۇرگىزەدى.
ساۋالنامادا جەتى سۇراقتان تۇرادى. قارىز الۋشىدان كرەديتتى رەسىمدەۋدى كىم ۇسىنعانى، كرەديت الۋ ءۇشىن ءوزىنىڭ دەربەس تۇردە نەمەسە ءۇشىنشى تۇلعالاردىڭ ءوتىنىشى بويىنشا جۇگىنگەنى، قارىزدىڭ قانداي ماقساتتارعا رەسىمدەلىپ جاتقانى، شارتتىڭ نەگىزگى تالاپتارىمەن تانىسقانى نە تانىسپاعانى، الدەكىمنىڭ قىسىم جاساپ جاتقانى نەمەسە قارىز رەسىمدەۋگە اسىقتىرىپ جاتقانى، وعان كرەديت رەسىمدەۋ فاكتىسىن بانك قىزمەتكەرلەرىنەن نەمەسە تۋىستارىنان جاسىرۋعا كەڭەس بەرىلگەنى نە بەرىلمەگەنى تۋرالى، سونداي- اق، وسىعان دەيىن «اقشانى قورعاۋ» نەمەسە «شوت بويىنشا وپەراتسيالاردى تەكسەرۋ» تۋرالى ۇسىنىسپەن قوڭىراۋلاردىڭ بولعانى نە بولماعانى تۋرالى سۇرايدى.
- ساۋالناما ناتيجەسى بويىنشا ىقتيمال الاياقتىق نەمەسە قارىزدى ءۇشىنشى تۇلعالاردىڭ ىقپالىمەن رەسىمدەۋ بەلگىلەرى انىقتالعان كەزدە بانك قارىز الۋدىڭ ءمان-جايلارىنا قوسىمشا تەكسەرۋ جۇرگىزەدى، ونىڭ ىشىندە قارىز الۋشىعا ىقتيمال الاياقتىق ارەكەتتەرگە بايلانىستى تاۋەكەلدەر تۋرالى قوسىمشا حابارلايدى. تەكسەرۋ ناتيجەسى بويىنشا قارجى ۇيىمى شارت جاساۋ، انىقتالعان ءمان-جايلار جويىلعانعا دەيىن ونى جاساۋدى توقتاتا تۇرۋ نە شارت جاساۋدان باس تارتۋ تۋرالى شەشىم قابىلدايدى، - دەلىنگەن اگەنتتىك تاراتقان اقپاراتتا.
جاڭا تالاپتار بيومەتريالىق اۋتەنتيفيكاتسيانى، قوماقتى ونلاين-قارىزدار بەرۋ كەزىندەگى «شەشىم قابىلداۋ كەزەڭىن» جانە قارىزدار مەن ميكروكرەديتتەر الۋدان ەرىكتى تۇردە باس تارتۋ مۇمكىندىگىن قوسا العاندا، الاياقتىق كرەديت بەرۋگە قارسى ءىس-قيمىل جونىندەگى قولدانىستاعى شارالاردى تولىقتىرادى.
وسىعان دەيىن بانك قايتىس بولعان ادامنىڭ تۋىستارىنان نەسيەنى وتەۋدى تالاپ ەتە الا ما دەگەن ساۋالعا جاۋاپ ىزدەگەن ەدىك.