قىتايداعى XIX جازعى ازيا ويىندارى بيىل وتپەيتىن بولدى
21:09, 06 - مامىر 2022
نۇر-سۇلتان. قازاقپارات - قىتايدىڭ حانجوۋ قالاسىندا قىركۇيەك ايىنا جوسپارلانعان ازيا ويىندارى مەن جاستار اراسىنداعى ازيا ويىندارى 2023-جىلى وتەتىن بولدى.
بۇل تۋرالى ازيا وليمپيادالىق كەڭەسى (ACA) پرەزيدەنتىنىڭ مىندەتىن اتقارۋشى راندحير سينگح حابارلادى.
ناقتى سەبەبى بەلگىسىز، الايدا، بىرەۋلەر شانحايداعى ەپيدەميولوگيالىق جاعدايعا بايلانىستى ەكەنىن ايتۋدا.
ويىنداردى كەيىنگە شەگەرۋ تۋرالى شەشىم تاشكەنتتە ءوتىپ جاتقان ازيا وليمپيادالىق كەڭەسى اتقارۋشى كوميتەتىنىڭ وتىرسىندا قابىلداندى.
قىتايداعى كوپتەگەن سپورتتىق جارىستار COVID-19 پانەدەمياسى باستالعاننان بەرى كەيىنگە قالدىرىلىپ، ءتىپتى مۇلدەم وتپەي قالعان ەدى. تەك بيىلعى قىسقى وليمپيادا ويىندارى عانا قاتاڭ شەكتەۋلەرمەن وتكەن ەدى.
حانجوۋداعى ويىنداردى ۇيىمداستىرۋشىلار ءساۋىر ايىندا سپورتتىق شارا وتەتىن 56 سپورت قۇرىلىمنىڭ قۇرىلىسى اياقتالعاندىعىن مالىمدەگەن ەدى. جارىسقا 44 ەلدەن 11 مىڭ سپورتشى قاتىسادى دەپ جوسپارلانعان بولاتىن.