قور جەكە تۇلعالاردىڭ دەپوزيتتەرى بويىنشا مولشەرلەمەلەردى رەتتەۋدى ىرىقتاندىرۋ اياسىندا 2026 -جىلدىڭ 1-قازانىنان باستاپ، كەيبىر ۆاليۋتالىق دەپوزيتتەر بويىنشا شەكتى مولشەرلەمەلەردىڭ كوتەرىلەتىندىگى تۋرالى حابارلايدى.
- قازىرگى كەزەڭدە مەرزىمى 12 ايدان جوعارى جيناق سالىمداردىڭ مولشەرلەمەلەرى عانا وزگەرەدى، ياعني 1-قازاننان باستاپ، مۇنداي سالىمدار بويىنشا شەكتى مولشەرلەمە جىلدىق 1,0 پايىزدان 2,5 پايىزعا دەيىن جوعارىلايدى. جاڭا شەكتى سىياقى مولشەرلەمەلەرى 2026 -جىلدىڭ 1-قازانىنان كەيىن اشىلاتىن نەمەسە مەرزىمى ۇزارتىلاتىن سالىمدارعا عانا قولدانىلۋى مۇمكىن. اتاپ ءوتۋ كەرەك، شەكتى مولشەرلەمەلەر - شەتەل ۆاليۋتاسىنداعى دەپوزيتتەر بويىنشا سىياقى مولشەرلەمەلەرىن انىقتاۋ ءۇشىن ۇسىنىلاتىن جوعارعى شەكارا سانالادى. بۇل رەتتە بانكتەر وزدەرىنىڭ دەپوزيتتىك ونىمدەرى بويىنشا سىياقى مولشەرلەمەلەرىنىڭ دەڭگەيى تۋرالى شەشىمدى ءوز بەتىمەن قابىلدايدى. بۇل كەزەڭدە ءار ءتۇرلى مەرزىمگە اشىلاتىن مەرزىمدى، مەرزىمسىز، سونداي-اق مەرزىمى 12 اي جانە ودان تومەن بولاتىن جيناق سالىمدار بويىنشا شەكتى مولشەرلەمەلەر 1 پايىز دەڭگەيىندە وزگەرىسسىز قالادى، - دەيدى ۆەدومستۆو ماماندارى.
ق د ك ب ق ءمالىم ەتكەندەي، بۇل شەشىمگە ق ر ۇلتتىق بانكىنىڭ دەپوزيت نارىعىن دوللارسىزداندىرۋ ساياساتىن ءساتتى جۇرگىزگەندىگىنىڭ ارقاسىندا قول جەتكىزىلدى.
- دوللارلانۋ دەڭگەيى 2015 -جىلداعى 80 پايىزدان 2026 -جىلدىڭ 1-قىركۇيەگىنە قاراي 19,2 پايىزعا دەيىن تومەندەدى. سونىمەن بىرگە ءتيىمدى ماكروەكونوميكالىق جاعدايات جانە جىل بارىسىندا تەڭگەنىڭ نىعايۋ ءۇردىسى ۇلتتىق بانككە قورمەن بىرلەسىپ، ۆاليۋتا نارىعىنداعى رەفورمالاردى ودان ءارى جالعاستىرىپ، ۆاليۋتالىق دەپوزيتتەر بويىنشا مولشەرلەمەلەردى رەتتەۋگە قاتىستى قولدانىستاعى تاسىلدەردى كەزەڭ-كەزەڭمەن ىرىقتاندىرۋعا كىرىسۋگە مۇمكىندىك بەردى. جەكە تۇلعالاردىڭ شەتەل ۆاليۋتاسىنداعى دەپوزيتتەرى بويىنشا ق د ك ب ق ماكسيمالدى كەپىلدىگى وزگەرىسسىز قالادى، - دەلىنگەن حابارلامادا.
ەسكە سالامىز، ق د ك ب ق قازاقستاندىق سالىمشىلاردىڭ ءاربىر بانكتەگى جيناق اقشاسىن زاڭنامالىق تۇرعىدا قورعالۋىن قامتاماسىز ەتەدى:
20 ميلليون تەڭگەگە دەيىن - سىياقىسىن قوسقاندا تەڭگەدەگى جيناق سالىمدار بويىنشا (مەرزىمىنەن بۇرىن الۋعا بولمايتىن دەپوزيتتەر)؛
10 ميلليون تەڭگەگە دەيىن - سىياقىسىن قوسقاندا، تەڭگەدەگى باسقا سالىمدار، سونداي-اق تەڭگەدەگى اعىمدىق شوتتار مەن تولەم كارتالارى بويىنشا؛
5 ميلليون تەڭگەگە دەيىن - سىياقىسىن قوسقاندا، دوللار، ەۋرو نەمەسە باسقا دا شەتەل ۆاليۋتاسىنداعى كەز كەلگەن سالىمدار، شوتتار جانە كارتالار بويىنشا.
ايتا كەتەيىك، قازاقستاننىڭ دەپوزيتتەرگە كەپىلدىك بەرۋ قورى بانكتەر اراسىندا باسەكەلەستىكتى ىنتالاندىرۋ، بانك سەكتورىندا جۇيەلىك تاۋەكەلدەردىڭ جينالۋىن ەسكەرتۋ جانە قارجىلىق تۇراقتىلىقتى قامتاماسىز ەتۋ ماقساتىندا جەكە تۇلعالاردىڭ دەپوزيتتەرى بويىنشا سىياقى مولشەرلەمەلەرىن رەتتەۋدى جۇزەگە اسىرادى. قازىرگى ساتتە دەپوزيتتەرگە كەپىلدىك بەرۋ جۇيەسىنە 20 بانك قاتىسادى.